Elizabẹt ghaa mwẹ ọtẹn nokhuo ọkpa vbuwe ẹgbẹe na tie ẹre Meri; Nazarẹt nọ rre Galili ẹre Meri ghaa ye. E Josẹf ne ekabita ẹre Meri khian rọnmwẹ. Vbe ẹko Elizabẹt ghi rre uki ehan, e Gebriẹl ne odibosa na rhiegbe ma e Meri. Ọ keghi tama rẹn wẹẹ: ‘Ọfunmwegbe guẹ rrọọ e Meri. E Jehova ru ruẹ ẹse nẹ.’ E Meri ma rẹn eke ne ọ guan rrie. Ọ na ghi tama e Meri wẹẹ: ‘U gha hanmwa, u ghi biẹ ọmọ okpia ọkpa, u ghi gha tie ẹre Jesu. Irẹn gha kha zẹvbe Ọba. Arriọba ọghẹe ghi gha rrọọ vbe ẹdẹdẹmwẹdẹ.’

E Meri keghi kha wẹẹ: ‘I ma he rẹn okpia. Vbia khian ghi ya sẹtin biẹ hẹ?’ E Gebriẹl keghi kha wẹẹ: ‘Ai miẹn emwi ne Jehova i sẹtin ru. Orhiọn nọhuanrẹn gha hin yan ruẹ, u ghi biẹ ọmọ okpia. Elizabẹt ne ọtuẹn wa vbe hanmwa nẹ nia.’ E Meri keghi kha wẹẹ: ‘Ọguọmwadia e Jehova ẹre I khin. Giẹ gele sẹ vbe egbe mwẹ vbene u khare na.’

 E Meri keghi ya tuẹ Elizabẹt vbe ẹvbo nọ rre uhunmwu oke vbe otọ e Judia. Vbe Elizabẹt ghi họn urhu e Meri, ọmọ nọ rre ọre ẹko na gha san yo san rre. Orhiọn nọhuanrẹn keghi gua Elizabẹt kpa ne ọ ya kha wẹẹ: ‘E Meri, e Jehova fiangbuẹ nẹ. Ọghọ ẹre u mu yọ mwẹ egbe, ne uwẹ ne iye Nọyaẹnmwẹ na gha dee do tuẹ mwẹ.’ E Meri keghi kha wẹẹ: ‘E Jehova ruẹse vbe egbe mwẹ.’ E Meri keghi gbe uki eha vbe ọghe Elizabẹt, ọ ke gha rrie owa.

Vbe Josẹf ghi họn wẹẹ e Meri hanmwa, ọ na wẹẹ irẹn i ghi rhie. Sokpan odibosa keghi rhiegbe ma rẹn vbe imina, ọ na tama rẹn wẹẹ: ‘Ghẹ gi ohan muẹn, rhie ẹre zẹvbe ọvbokhan ruẹ. Ọ ma ru emwi rhọkpa khọọ.’ E Josẹf na ghi ya rhie Meri gha die owa re zẹvbe amwẹ ọnrẹn.