Eejatü wanee majayüt süpüshi Elisabet, María sünülia. Kepiapuʼusü shia suluʼu tü pueulokot Nazaret suluʼu tü mmakat Judea, otta kasaalüinjatü shia nümaa wanee wayuu aʼyataai süka taapüla, José nünülia. Aipiruapa kashi Elisabet sünain ipuwoluin, antüshi chi aapieekai Gabriel sünainmüin María. «Jamayaa pia María, eeshi chi Maleiwakai pümaa süka kojutuin maʼin pia nutuma», nümaka sümüin. Nnojotsü shiyaawatüin aaʼu María jamaluʼuluin nünüiki chi aapieekai. «Ipuoleerü pia. Jemeyuleerü pia nümaa wanee joʼuu toolo piʼitaajeerü Jesuuin nünülia. Niainjachi wanee aluwataai otta Aluwataainjachi nia süpüla kaʼikat süpüshuaʼa», nümaka Gabriel sümüin.

«¿Jamakuwaʼipat süpüla kachoinjatüin taya sümaa nnojoluin nünainpünaain taya wayuu toolo?», sümaka María. Nusoutaka Gabriel sümüin: «Soto paaʼin nnojoluin kasain isain nüchiki Jeʼwaa, nuluwataainjachi chi naaʼinkai süpüla ipuoluinjatüin pia, müsia tü püüʼitkat Elisabet, aipiruairü kashi shia ipuoluin sümaa maralüin shia paala». Susoutaka  María: «Anuu joo taya nümüin Maleiwa. Anashi müleka naaʼinrüle taka tü püküjakat achiki tamüin».

Suʼunaka María eemüin Elisabet, kepiasü Elisabet suluʼu wanee pueulo saaʼusü namünashii. Süntapa María shipialuʼumüin süsaküin shia, wanaa maʼin sümaa tia akutulaashi chi joʼuukai süleʼeruʼu Elisabet. Nüntaka chi naaʼinkai Maleiwa sünainmüin. «Anataʼaleesüjaʼa maʼin pukuwaʼipa nutuma Jeʼwaa, otta anakuwaʼipalü taya süka püntüin tepialuʼumüin, süka piain niin chi Tasenyotsekai», sümaka sümüin María. Susoutaka María sümüin: «Taʼwaajüin Jeʼwaa süka süpüshuaʼa taaʼin». Makataka shia apünüin kashi shipialuʼu Elisabet. Süleʼejaka mapa Nazaretmüin.

Nütüjaapa saaʼu José ipuwoluin María, nnojoishi nia kasaaleein sümaa. Nüntaka wanee aapiee nüʼlapüinruʼu. «Nnojo piyouktüin María süpüla puʼwayuuseinjatüin, nnojotsü aaʼinrüin kasa mojusü», nümakalaka nümüin. Kasaatka José mapa sümaa María.