María ningo Elisabet pariénte. Haʼe oiko vaʼekue Galiléape, peteĩ siuda héravape Nazaret. Ohasávo seis mése Elisabet hyeguasu hague, ánhel Gabriel ojeaparese Maríape. Upérõ María omendapotaitéma kuri peteĩ karpintéro héravare José. Upéi pe ánhel heʼi Maríape: “Mbaʼéichapa María, Jehová ndeguerohoryeterei ha oĩ nendive”. Haʼe nontendéi mbaʼérepa pe ánhel heʼi chupe péicha. Upémarõ pe ánhel oexplika Maríape: “Nderyeguasúta ha reguerekóta peteĩ mitãkuimbaʼe ha rembohéra vaʼerã Jesús. Chugui oikóta rréi ha Irréino ndopamoʼãi arakaʼeve”.

María katu heʼi pe ánhelpe: “¿Mbaʼéicha piko oikóta upéva? Che ningo ndaikói gueteri kuimbaʼéndi”. Pe ánhel heʼi chupe: “Espíritu sánto rupive nderyeguasúta ha erekóta peteĩ mitã. Ne pariénte Elisabet oime hyeguasu avei”. Upémarõ María heʼi chupe: “¡Che ningo Jehová rembiguái! Toiko katu cherehe ere haguéicha”.

 María oho ovisita Elisabétpe, haʼe ningo oiko peteĩ puévlo oĩvape peteĩ sérrope. Og̃uahẽvo, María osaluda chupe, ha Elisabet ohendúvo Maríape, oñandu mbaʼéichapa imemby okuʼe hyépe. Haʼe henyhẽ espíritu sántogui ha heʼi: “María, Jehová nevendesi. Avyʼaitépa ou haguére chevisita che Ruvicha sy. Tuichaiterei mbaʼe ningo upéva chéve g̃uarã”. María heʼi chupe: “Che pyʼaite guive ambotuicha Ñandejárape”. María opyta tres mése Elisabet ndive hógape ha upéi ae oho jey Nazarétpe.

José oikuaárõ guare María hyeguasuha, nomendasevéima hese. Péro peteĩ ánhel ojeaparese Josépe isuéñope ha heʼi chupe: “Ani rekyhyje remenda hag̃ua Maríare. Haʼe ningo ndojapói mbaʼeve ivaíva”. Upémarõ José omenda María rehe ha ogueraha chupe hendive hógape.