Elisabet wa ri nomuzamumwe wena Maria, ngwa turire motjihuro Nasaret tjaGalilea. Maria wa varekerwe i omurumendu wena Josef, ngwa ri omuhonge womiti. Indu Elisabet tja ri noungundi womieze 6, omuengeli Gabriel wa munika ku Maria. Eye wa tja: “Minikwa, ove ngu wa ingonekwa notjari. Muhona u ri puna ove nu we ku sera ondaya!” Eye kaa tjiwa kutja omambo ngo maye hee tjike. Okuzambo Gabriel wa tja ku ye: ‘Ove mo rire otjingundi nu mo panduka omuatje omuzandu nove mo sokumuruka Jesus. Eye ma honapara otjOmbara. Ouhona we mau karerere nga aruhe.’

Maria wa tja: ‘Otjiṋa hi matji tjitwa vi? Ami hi ya rora okuhakaena ku nomurumendu.’ Gabriel wa tja: ‘Ndjambi ke notjiṋa tji tje mu ura. Ombepo ye ondjapuke mai ya kombanda yoye nove mo panduka omuatje omuzandu. Omuzamumwe woye Elisabet wina otjingundi.’ Okuzambo Maria wa tja: “Owami omukarere  waMuhona, ngape tjitwe ku ami otja punga awa hee.”

Maria wa ya kotjihuro tji tja ri mozondundu okukaryangera Elisabet. Indu Maria tja korisa Elisabet, okanatje mezumo raElisabet ka nyinganyinga. Neye wa urisirwe nombepo ondjapuke na tja: ‘Maria, oove omuyozikwa mokati kovakazendu. Otjiṋa otjinene ku ina yoMuhona wandje okuyekundjiryangera.’ Maria wa tja: ‘Me tanga Muhona nomutima wandje auhe.’ Maria wa kara puna Elisabet oure womieze 3 okuzambo a yaruka konganda koNasaret.

Indu Josef tja zuva kutja Maria otjingundi, eye aa vanga okuhaṋika kuna ye. Posiya omuengeli wa munika ku Josef moruroto na tja: ‘O tira okukupa Maria. Eye ke notjiṋa otjivi tja tjita.’ Okutja Josef wa kupa Maria nemu eta koye.