Elisabet bisi seiku kaban belayan biak ke benama Maria. Iya diau ba Nasaret menua Galili. Maria betunang enggau Josep, seiku tukang kayu. Lebuh Elisabet udah betubuh-bisi enam bulan, melikat Gabriel ngayanka diri ngagai Maria. Ku iya: ‘Tabi ke nuan, Maria. Nuan amat dikerinduka Jehovah!’ Maria enda mereti utai ku Gabriel. Lalu ku melikat nya: ‘Nuan deka betubuh-bisi, lalu ngadaka seiku anak lelaki, lalu nuan deka meri iya nama Jesus. Iya deka nyadi Raja. Perintah iya deka meruan belama iya.’

Ku Maria: ‘Tang, aku agi dara bungas. Baka ni aku deka bisi anak?’ Gabriel bejaku: ‘Nadai utai ke enda ulih dikereja Jehovah. Roh kudus deka datai atas nuan, lalu nuan deka bisi seiku anak lelaki. Kaban belayan nuan Elisabet mega udah betubuh-bisi.’ Ku Maria bejaku: ‘Aku tu nembiak Jehovah. Awakka utai nya nyadi ba aku nitihka ku nuan.’

 Maria lalu mupuk ngagai sebuah nengeri ti bebukit deka nemuai ngagai Elisabet. Lebuh Maria meri tabi basa ngagai Elisabet, anak mit dalam kandung Elisabet engkebut. Penuh laban roh kudus, Elisabet madah: ‘Jehovah udah merekatka nuan Maria. Tu endang siti basa laban indai Messiah nyau nemuai ngagai aku.’ Ku Maria: ‘Aku muji Jehovah enggau pengabis ati aku.’ Maria lalu diau enggau Elisabet pengelama tiga bulan, udah nya iya pulai baru ngagai Nasaret.

Lebuh Josep nemu Maria udah betubuh-bisi, iya deka mutuska tunang. Tang, seiku melikat ayan ba mimpi iya lalu madah: ‘Anang takut ngambi Maria nyadika bini nuan. Iya nadai ngereja sebarang penyalah.’ Josep lalu ngambi Maria nyadika bini iya.