Li xMaria jun saaj ixqaʼal li wank saʼ li tenamit Nazaret aran Galilea ut wank choʼq xkomon li xʼElisabet. Li xMaria ok re raj chi sumlaak rikʼin jun laj peechʼ, Jose xkʼabʼaʼ. Waqibʼ po xkanajik saʼ yuʼam li xʼElisabet naq li anjel Gabriel kutamil chiru li xMaria ut kixye re: «Sahaq aachʼool, Maria, li Jehobʼa xʼosobʼtesink aawe». Li xMaria inkʼaʼ kixtaw ru li kiyeeheʼk re xbʼaan li anjel Gabriel, joʼkan naq kichʼolobʼaak chiru: «Tatkanaaq saʼ yuʼam ut twanq jun aayum. Taakʼe choʼq xkʼabʼaʼ Jesus. Aʼanaq awabʼej, ut li Xʼawabʼejilal twanq chi junelik».

Li xMaria kixye: «Abʼan inkʼaʼ innawom ru winq. Chanru twanq inkʼuulaʼal?» Li anjel Gabriel kixye re: «Chiru li Jehobʼa maakʼaʼ chʼaʼaj. Li santil musiqʼej tchalq saʼ aabʼeen ut twanq jun aayum. Li xʼElisabet, laakomon, wank ajwiʼ saʼ yuʼam». Tojaʼ naq li xMaria kixye re: «Laaʼin xmoos li Jehobʼa. Chiʼuxq we li xaaye».

 Li xMaria kiwulak rulaʼaninkil li xʼElisabet saʼ jun li tenamit li wank saʼ tzuul. Naq kiwulak, kixkʼe xsahil xchʼool, ut li xʼElisabet kirekʼa naq li kʼuulaʼal kipiskʼok saʼ xsaʼ. Li xʼElisabet kinujak chi santil musiqʼej ut kixye: «Maria, li Jehobʼa xatrosobʼtesi. Jwal loqʼ naq xchalk wulaʼaninkil li xnaʼ Linqaawaʼ». Li xMaria kixye re: «Ninkʼe xloqʼal li Jehobʼa chi anchal linchʼool». Tojaʼ naq kikanaak oxibʼ po rikʼin xʼElisabet ut chirix chik aʼan kisutqʼiik saʼ rochoch aran Nazaret.

Naq laj Jose kixnaw naq li xMaria wank saʼ yuʼam, inkʼaʼ chik kiraj sumlaak rikʼin. Abʼan jun li anjel kixkʼut ribʼ saʼ xmatkʼ laj Jose ut kixye re: «Matxuwak chi sumlaak rikʼin xMaria. Inkʼaʼ xkʼat aawoq». Joʼkan naq, laj Jose kisumlaak rikʼin ut kixkʼam saʼ rochoch.