Elizabethi nĩ maarĩ na mũirĩtu wa famĩlĩ yao wetagwo Mariamu, ũrĩa waikaraga itũũra-inĩ rĩa Nazarethi thĩinĩ wa Galili. Mariamu maarĩ ndũgũ na bundi wa mbaũ wetagwo Jusufu. Rĩrĩa Elizabethi aarĩ na nda ya mĩeri ĩtandatũ, mũraika Gaburieli nĩ oimĩrĩire Mariamu. Aamwĩrire ũũ: ‘Ũrĩ mwega Mariamu. Jehova nĩ akũrathimĩte mũno.’ Ndaataũkĩirũo nĩ ũrĩa mũraika aamwĩrire. Gaburieli aacokire akĩmwĩra ũũ: ‘Nĩ ũkũgĩa nda, ũgĩe mwana wa kahĩĩ, na ũkamwĩta Jesu. Agatuĩka Mũthamaki, na Ũthamaki wake ũgaatũũra tene na tene.’

Mariamu aamwĩrire ũũ: ‘Niĩ ndirĩ ndakoma na mũndũrũme. Ingĩgĩa mwana atĩa?’ Gaburieli akĩmũcokeria: ‘Gũtirĩ ũndũ ũngĩrema Jehova. Roho mũtheru nĩ ũgooka igũrũ rĩaku na nĩ ũkaagĩa kahĩĩ. Elizabethi wa mbarĩ cianyu o nake nĩ agĩte nda.’ Mariamu aacokire akĩmwĩra ũũ: ‘Niĩ ndĩ ngombo ya  Jehova. Reke gwĩkĩke harĩ niĩ o ta ũguo woiga.’

Mariamu nĩ aathiire gũceerera Elizabethi itũũra-inĩ rĩmwe rĩarĩ kũndũ kwarĩ irĩma. Rĩrĩa Mariamu aamũgeithirie, Elizabethi nĩ aaiguire kaana karĩa kaarĩ nda yake kaambarara. Aaiyũrirũo nĩ roho mũtheru na akiuga ũũ: ‘Mariamu, Jehova nĩ akũrathimĩte. Nĩ gĩtĩo kĩnene gũceererũo nĩ nyina wa Mwathani wakwa.’ Nake Mariamu akĩmwĩra ũũ: ‘Ndĩragooca Jehova na ngoro yakwa yothe.’ Mariamu aaikarire na Elizabethi mĩeri ĩtatũ agĩcoka akĩinũka kwao Nazarethi.

Rĩrĩa Jusufu aamenyire atĩ Mariamu aarĩ na nda, nĩ eendaga kũniina ndũgũ yao. No mũraika nĩ aamumĩrĩire kĩroto-inĩ akĩmwĩra ũũ: ‘Ndũgetigĩre kũmũhikia. Gũtirĩ ũndũ mũũru ekĩte.’ Nĩ ũndũ ũcio, Jusufu nĩ aahikirie Mariamu na akĩmũinũkia gwake.