មេរៀនទី៦៩
កាព្រីយ៉ែលមកជួបម៉ារៀ
អេលីសាបិតមានសាច់ញាតិម្នាក់ឈ្មោះម៉ារៀ។ នាងរស់នៅក្រុងណាសារ៉ែតស្រុកកាលីឡេ។ ម៉ារៀបានភ្ជាប់ពាក្យជាមួយនឹងយ៉ូសែប ជាជាងឈើ។ ពេលអេលីសាបិតមានផ្ទៃពោះ៦ខែ ទេវតាកាព្រីយ៉ែលបានលេចមកជួបម៉ារៀ។ ទេវតានិយាយទៅនាងថា៖ ‹សួស្ដីម៉ារៀ! ព្រះយេហូវ៉ាពេញចិត្តនាងខ្លាំងណាស់›។ ប៉ុន្តែ ម៉ារៀមិនយល់សម្ដីរបស់ទេវតាទេ។ រួចទេវតានិយាយទៀតថា៖ ‹នាងនឹងមានផ្ទៃពោះ រួចសម្រាលបានកូនប្រុសមួយ។ នាងត្រូវដាក់ឈ្មោះកូននោះថា យេស៊ូ។ កូននោះនឹងគ្រប់គ្រងជាស្ដេច ហើយរាជាណាចក្ររបស់កូននោះនឹងស្ថិតស្ថេរជារៀងរហូត›។
ម៉ារៀតបថា៖ ‹ប៉ុន្តែ ខ្ញុំនៅក្រមុំបរិសុទ្ធ តើខ្ញុំអាចមានកូនដូចម្ដេចបាន?›។ កាព្រីយ៉ែលឆ្លើយថា៖ ‹គ្មានអ្វីដែលព្រះយេហូវ៉ាមិនអាចធ្វើបានឡើយ។ ឫទ្ធានុភាពបរិសុទ្ធរបស់លោកនឹងសណ្ឋិតលើនាង រួចនាងនឹងមានកូនប្រុសម្នាក់។ អេលីសាបិតដែលជាសាច់ញាតិនាង ក៏មានផ្ទៃពោះដែរ›។ រួចម៉ារៀនិយាយថា៖ ‹ខ្ញុំជាខ្ញុំបម្រើរបស់ព្រះយេហូវ៉ា។ សូមឲ្យការនេះកើតឡើងដល់ខ្ញុំ ដូចលោកបាននិយាយចុះ›។
រួចមក ម៉ារៀធ្វើដំណើរទៅក្រុងមួយនៅឯភ្នំ ដើម្បីទៅលេងអេលីសាបិត។ ពេលឮសំឡេងសួរសុខទុក្ខរបស់ម៉ារៀ អេលីសាបិតដឹងថាកូនក្នុងផ្ទៃរបស់នាងកញ្ជ្រោលឡើង។ ភ្លាមនោះដោយឫទ្ធានុភាពបរិសុទ្ធរបស់ព្រះ អេលីសាបិតពោលថា៖ ‹ម៉ារៀ! ព្រះយេហូវ៉ាបានឲ្យពរដល់នាង។ ខ្ញុំមានកិត្តិយសណាស់ដែលម្ដាយរបស់លោកម្ចាស់ខ្ញុំ មកលេងខ្ញុំ›។ ម៉ារៀនិយាយថា៖ ‹ខ្ញុំសូមសរសើរតម្កើងព្រះយេហូវ៉ាដោយអស់ពីចិត្ត›។ បន្ទាប់ពីស្នាក់នៅជាមួយនឹងអេលីសាបិតអស់បីខែ ម៉ារៀត្រឡប់ទៅផ្ទះនៅក្រុងណាសារ៉ែតវិញ។
ពេលយ៉ូសែបដឹងថាម៉ារៀមានផ្ទៃពោះ គាត់ចង់ផ្ដាច់ពាក្យពីនាង។ ប៉ុន្តែ ទេវតាមួយបានលេចមកប្រាប់គាត់ក្នុងសុបិនថា៖ ‹កុំខ្លាចនឹងរៀបការជាមួយនាងឡើយ។ នាងមិនបានធ្វើអ្វីខុសទេ›។ ដូច្នេះ យ៉ូសែបរៀបការជាមួយនឹងម៉ារៀ ហើយនាំនាងទៅផ្ទះរបស់គាត់។
«ព្រះយេហូវ៉ាធ្វើអ្វីៗតាមដែលលោកពេញចិត្ត ទាំងនៅស្ថានសួគ៌ នៅផែនដី»។—ចម្រៀងសរសើរព្រះ ១៣៥:៦
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
ម៉ារៀមានផ្ទៃពោះមុនរៀបការ
ពេលម៉ារៀប្រាប់យ៉ូសែបថានាងមានផ្ទៃពោះតាមរយៈសកម្មពលបរិសុទ្ធ មិនមែនដោយសាររួមរស់ជាមួយនឹងបុរសណាទេ តើយ៉ូសែបជឿម៉ារៀឬទេ?
