Ilizabɛt bin gɛt wan in fambul we nem Meri we de na Nazarɛt insay Galili. Meri bin ɛngej to Josɛf we na bin kapɛnta. We Ilizabɛt in bɛlɛ bin de siks mɔnt, enjɛl Gebrɛl apia to Meri. I tɔk se: ‘Adu o, Meri. Jiova rili lɛk yu.’ I nɔ ɔnda­stand wetin Gebrɛl min. Gebrɛl tɛl am se: ‘Yu go gɛt bɛlɛ ɛn yu go bɔn bɔypikin, ɛn yu fɔ kɔl am Jizɔs. I go bi Kiŋ. In Kiŋdɔm go de sote go.’

Meri tɔk se: ‘Bɔt mi na vajin. Aw a go ebul fɔ gɛt pikin?’ Enjɛl Gebrɛl tɔk se: ‘Natin nɔ de we Jiova nɔ ebul fɔ du. Oli spirit go kam pan yu, ɛn yu go bɔn bɔypikin. Yu fambul Ilizabɛt insɛf dɔn gɛt bɛlɛ.’ Meri tɔk se: ‘Mi na Jiova in slev. Mek ɔl wetin yu tɔk apin to mi jɔs lɛk aw yu se.’

Meri go ɔp wan il na wan siti fɔ go fɛn Ilizabɛt. We Meri grit am, Ilizabɛt fil we in yɔŋbebi jomp na in bɛlɛ. Oli spirit  kam pan Ilizabɛt, ɛn i tɔk se: ‘Meri, Jiova dɔn blɛs yu. Na big big ɔnɔ fɔ mek mi Masta in mama kam fɛn mi na mi os.’ Meri tɔk se: ‘A de prez Jiova wit ɔl mi at.’ Meri de wit Ilizabɛt fɔ tri mɔnt, ɛn afta dat i go bak na in os na Nazarɛt.

We Josɛf kam fɔ no se Meri dɔn gɛt bɛlɛ, i nɔ bin want fɔ mared am igen. Bɔt wan enjɛl apia to am na in drim ɛn tɛl am se: ‘Nɔ fred fɔ mared am. I nɔ du natin we bad.’ So Josɛf tek Meri as in wɛf, ɛn i go wit am na in os.