တၢ်မၤလိ ၆၉
ကၤဘြံၤအ့လးဟဲလၢနီၢ်မၤရံအအိၣ်
နီၢ်အ့းလံၤစါဘ့းအိၣ်ဒီး အဘူးအတံၢ်တဂၤ လၢအမံၤမ့ၢ်နီၢ်မၤရံလီၤ. နီၢ်မၤရံန့ၣ် အိၣ်ဝဲလၢဝ့ၢ်နစၤရ့း, ကီၢ်ကၤလံၤလါအပူၤလီၤ. ဒီးနီၢ်မၤရံဘၣ်တၢ်ပာ်အဲၣ်တီန့ၢ်အီၤ ဒီးစီၤယိၤသးလီၤ. စီၤယိၤသးမ့ၢ်ဝဲ ပှၤစုသ့ဖိတဂၤလီၤ. ဖဲနီၢ်အ့းလံၤစါဘ့းဒၢန့ၢ်ဃုလါအခါ မူခိၣ်ကလူးကၤဘြံၤအ့လး ဟဲထံၣ်လိာ်အသးဒီးနီၢ်မၤရံလီၤ. မူခိၣ်ကလူးတဲဘၣ်အီၤလၢ– ‘နီၢ်မၤရံဧၢ, ယဟိဝၤယွၤဘၣ်သူၣ်ဘၣ်သးနၤလီၤ.’ နီၢ်မၤရံတနၢ်ပၢၢ် အခီပညီဘၣ်. ဝံၤဒီး ကၤဘြံၤအ့လးတဲဘၣ်အီၤလၢ– ‘နကဒၢထီၣ်ဒီး နကအိၣ်ဖျဲၣ်ထီၣ် ဖိခွါတဂၤဒီးနဘၣ်ကိးန့ၢ်အမံၤလၢ ယ့ၣ်ၡူးလီၤ. အဝဲကကဲထီၣ်စီၤပၤတဂၤ ဒီးအဘီအမုၢ်ကအိၣ်ဝဲ လီၤထူလီၤယိာ်လီၤ.’
နီၢ်မၤရံတဲက့ၤအီၤလၢ– ‘ယမ့ၢ်ပှၤမုၣ်ကနီၤစီဆှံတဂၤအဃိ ယဒၢထီၣ် ကသ့ဒ်လဲၣ်.’ ကၤဘြံၤအ့လးတဲဆၢက့ၤအီၤလၢ– ‘တၢ်လၢယဟိဝၤယွၤ မၤဝဲတသ့ဘၣ်န့ၣ် တအိၣ်နီတမံၤဘၣ်. ယွၤအသးစီဆှံ ကဟဲလီၤလၢနလိၤ ဒီးနကအိၣ်ဖျဲၣ်ထီၣ်ဖိခွါတဂၤလီၤ. နဘူးနတံၢ်နီၢ်အ့းလံၤစါဘ့း ဒၢထီၣ်ဝဲစ့ၢ်ကီးလီၤ.’ ဝံၤဒီး နီၢ်မၤရံတဲဝဲလၢ– ‘ယမ့ၢ်ယဟိဝၤယွၤအကုၢ်ပိာ်မုၣ်လီၤ. မ်တၢ်မၤအသး ဒ်နတဲအသိးတက့ၢ်.’
နီၢ်မၤရံလဲၤဝဲဆူ နီၢ်အ့းလံၤစါဘ့းအအိၣ်လီၤ. နီၢ်အ့းလံၤစါဘ့းန့ၣ်အိၣ်ဝဲလၢ ယူဒၤအထံကီၢ် လၢကစၢၢ်ကလိအကျါန့ၣ်လီၤ. ဖဲနီၢ်မၤရံဆၢဂ့ၤဆၢဝါ နီၢ်အ့းလံၤစါဘ့းအခါ ဖိသၣ်အိၣ်လၢနီၢ်အ့းလံၤစါဘ့း အဟၢဖၢပူၤန့ၣ် ဟူးဂဲၤထီၣ်ဝဲလီၤ. နီၢ်အ့းလံၤစါဘ့းလၢပှဲၤထီၣ်ဒီး ယွၤအသးစီဆှံဒီးတဲဝဲလၢ– ‘နီၢ်မၤရံဧၢ, ယဟိဝၤယွၤဆိၣ်ဂ့ၤနၤလီၤ. ယကစၢ်အမိၢ် ဟဲဟးအိၣ်သကိးယၤလၢယဟံၣ်န့ၣ် မ့ၢ်တၢ်ခွဲးတၢ်ယာ်ဖးဒိၣ်တခါလၢ ယဂီၢ်လီၤ.’ နီၢ်မၤရံတဲဝဲလၢ– ‘ယစံးထီၣ်ပတြၢၤယဟိဝၤယွၤလၢ ယသးဒီဖျၢၣ်ညါ.’ နီၢ်မၤရံအိၣ်ဝဲဒီးနီၢ်အ့းလံၤစါဘ့း သၢလါဝံၤဒီး အဝဲက့ၤဝဲဆူအဟံၣ်လၢနစၤရ့းလီၤ.
ဖဲစီၤယိၤသးသ့ၣ်ညါဝဲလၢ နီၢ်မၤရံဒၢထီၣ်ဝဲအခါ အဝဲတအဲၣ်ဒိးဟံးန့ၢ်နီၢ်မၤရံလၢၤဘၣ်. ဘၣ်ဆၣ် လၢစီၤယိၤသးအတၢ်မံမီၢ်အပူၤန့ၣ် မူခိၣ်ကလူးဟဲတဲဘၣ်အီၤလၢ– ‘တဘၣ်ပျံၤတၢ်လၢ နကဟံးန့ၢ်နီၢ်မၤရံတဂ့ၤ. အဝဲတမၤကမၣ်တၢ်နီတမံၤဘၣ်.’ လၢတၢ်န့ၣ်အဃိ စီၤယိၤသးဟံးန့ၢ် နီၢ်မၤရံဒ်အမါအသိး ဒီးဟဲက့ၤကိးအီၤဆူအဟံၣ်လီၤ.
“ယွၤမၤဝဲ ကယဲၢ်တၢ်ဘၣ်အသးလၢမူခိၣ်ပူၤ, ဒီးလၢဟီၣ်ခိၣ်ချၢ” လီၤ.—စံးထီၣ်ပတြၢၤ ၁၃၅:၆