Edisabeta wādi ubutulwa na nsongwakaji umo witwa bu Madia, wādi ushikata mu Nazala, kibundi kya mu Ngadilea. Madia bādi bamukwatyile kudi Yosefa sendwe wa mbao, mwanda wa kumusonga. Dīmi dya Edisabeta pa kubwanya myeji isamba, mwikeulu Ngabudyele wākamwekele Madia. Wāmunena’mba: ‘Madia wakoma’po. Yehova wakutōkelwa mutyima.’ Madia kāivwanijepo byādi bikimba kunena Ngabudyele. Penepo Ngabudyele wāmusapwila’mba: ‘Usa kwimita ne kubutula mwana mwana-mulume, kadi ukamwinika bu Yesu. Ukaludikanga bu Mulopwe. Kadi Bulopwe bwandi bukekala’ko nyeke.’

Madia wānena’mba: ‘Inoko nkyalēle na mwana-mulume. Le mbwanya’tu namani kubutula mwana?’ Ngabudyele wāmusapwila’mba: ‘I kutupu kintu nansha kimo kikomena Yehova. Mushipiditu ujila ukekala nobe, kadi ukabutula mwana mwana-mulume. Mwanenu Edisabeta nandi waimite aye papo ke mununu.’ Ebiya Madia wānena’mba:  ‘Ndi nsongwakaji umpika wa Yehova. Byonso byowanena bilongelwe monka.’

Madia wāenda kwa ba Edisabeta ku kibundi kya mikuna. Madia pa kumwimuna, Edisabeta waivwana kana kekatombojoka mu ndá. Edisabeta pa kuyulwa mushipiditu ujila, wānena’mba: ‘Madia, Yehova i mukwesele. I dyese’po kashā kutambula inandya Mfumwami mu yami njibo.’ Madia wānena’mba: ‘Natendela Yehova na mutyima wami onso.’ Madia washikata kwa Edisabeta myeji isatu, kupwa wākajokela kwabo ku Nazala.

Yosefa pa kuyuka’mba Madia kadi na dīmi, wādi kasake kumupela. Inoko mwikeulu umo wāmumwekela mu kilotwa, wāmusapwila’mba: ‘Kokikwatwa moyo wa kumusonga. I kutupu kibi kyalongele.’ Ebiya Yosefa wāsonga Madia ke wandi mukaji.