Elizaveta apwile nakausoko kenyi walijina lyaMaliya, uze atwaminenga munganda yaNazaleta muNgalileya. Maliya vamuhuhwile kuli Yosefwe muka-kusonga maliva. Omu Elizaveta ahetesele tukweji 6 kufuma halwola emichile, kangelo Ngavalyele asolokele kuli Maliya. Ngocho amumenekele ngwenyi: ‘Mwoyo wove, ove Maliya, Yehova nakukisula.’ Maliya katachikijile ulumbunwiso wavyuma vamulwezele kuli Ngavalyeleko. Ngocho amulwezele cheka ngwenyi: ‘Nawimita lijimo, kaha naukasema mwana walunga, ukamuluka lijina ngwove, Yesu. Mwakayula mwaMwangana. Kaha Wangana wenyi kaweshi kukakumako.

Maliya amuhulishile ngwenyi: ‘Uno nachipwa ngachilihi ngocho, mwomwo ami kanda nguchilisavaleho lyehi nalunga?’ Kaha Ngavalyele ambile ngwenyi: ‘Kakweshi mazu aze nahanjika Kalunga nawahona kutesamoko. Shipilitu yajila nayiza hali ove, kaha mukapwa namwana walunga. Kausoko kove Elizaveta naikiye nemita lijimo.’ Ngocho Maliya ambile ngwenyi: ‘Ami ndungo yaYehova wapwevo! Chipwenga vene ngocho kweseka namazu ove.’

 Ngocho Maliya akatukile nakuya kungalila yajipili nakushikama naElizaveta. Jino omu Maliya amenekele Elizaveta, kaha Elizaveta evwile kemba mujimo lyenyi mwalyungununa. Elizaveta azalile nashipilitu yajila, kaha alwezele Maliya ngwenyi: ‘Yehova nakukisula. Echi chinapu hikutokwa chikuma kungutambukila kuli naye yaMwata wami.’ Kaha Maliya ambile kuli ikiye ngwenyi: ‘Nangwalisanga Yehova namuchima wami wosena.’ Ngocho, Maliya ashikamine naElizaveta tukweji vatatu, kufumaho akindulukile kwimbo lyenyi kuNazaleta.

Omu Yosefwe atachikijile ngwenyi Maliya nemita, asakile kumulukulula. Oloze kangelo Ngavalyele asolokele kuli ikiye muchilota nakumulweza ngwenyi: ‘Kanda nawivwa woma wakumbata Maliyako. Keshi namulongako.’ Ngocho, Yosefwe ambachile pwevo lyenyi nakuputuka kutwama nenyi.