Ear wõr juon nukũn Elisabet jiroñ etan in Meri. Ear jokwe ilo bukwõn in Nazeret ilo Galili. Meri im Josep, eo ej juon rũkaam̦tõ, rar kallim̦ur ñan doon bwe erro naaj m̦are. Ilo tõre eo ke kar 6 an Elisabet allõñ, enjel̦ Gebriel ear wal̦o̦k ñan Meri im ba: ‘Yokwe Meri. Jeova elukkuun m̦õn̦õn̦õ ippam̦.’ Meri ear jab mel̦el̦e ta eo Gebriel ej kõnnaan kake. Innem Gebriel ear ba, ‘Kwõnaaj bõro̦ro im kal̦otak juon nejũm̦ l̦addik im kwõnaaj likũt etan Jesus. Enaaj irooj im kiiñ, im Aelõñ eo an enaaj pãd ñan indeeo.’

Meri ear ba: ‘Ak ña juon bõjin. Ewi wãween an naaj wõr nejũ ajri?’ Gebriel ear ba: ‘Ejjel̦o̦k men en̦ Jeova ejjab maroñe. Jetõb kwõjarjar eo an enaaj itok ioom̦, im enaaj wõr juon nejũm̦ l̦addik. Lel̦l̦ap eo nukum̦ Elisabet ebar bõro̦ro.’ Innem Meri ear ba: ‘Ña juon rũkarejeran Jeova. En jejjet men kein kwõj ba kõn eõ.’

 Meri ear etal ñan juon bukwõn ioon tol̦ ko im lol̦o̦k Elisabet. Ke Meri ej yokyokwe e, niñniñ eo lo̦jien Elisabet em̦m̦akũtkũt. Innem Elisabet ear obrak kõn jetõb kwõjarjar im ba: ‘Meri, Jeova ear kõjeraam̦m̦an eok. Ej juon jeraam̦m̦an bwe jinen Messaia eo epãd m̦wiin im̦õ.’ Meri ear ba: ‘Ij nõbar Jeova kõn aolepen bũruõ.’ Meri ear jokwe ippãn Elisabet ium̦win 3 allõñ. Innem ear ro̦o̦l ñan m̦weo im̦õn ilo Nazeret.

Ke Josep ear jel̦ã ke ebõro̦ro Meri, ear kõn̦aan bwe en bõjrak kallim̦ur eo aerro ñan m̦are. Bõtab juon enjel̦ ear wal̦o̦k ñane ilo juon ettõn̦ak im ba, ‘Kwõn jab mijak in m̦areik Meri. Ejjel̦o̦k men en̦ ebõd ear kõm̦m̦ane.’ Kõn men in, Josep ear m̦areiki im bõke bwe en pãleen.