A Elizabɛt ra tara yao t’a yʋʋr boond t’a Maari. A ra bee Nazarɛte, Galɩle soolmẽ wã. B ra rɩk-a lame n kõ a Zozɛf t’a na n wa yɩ a paga. A Zozɛf ra yaa ra-wãada. A Elizabɛt pʋgã sẽn wa n ta kiis a yoobe, malɛk a Gabriyɛll kẽnga a Maari nengẽ. A sẽn ta wã, a pʋʋs-a lame n yeel yaa: ‘A Zeova ninga foo bark wʋsgo.’ La a Maari pa wʋm a Gabriyɛll gomdã võor ye. A Gabriyɛll yeel-a lame: ‘Fo na n dɩka pʋga, n dog bi-ribla, n pʋd a yʋʋr t’a Zeezi. A na n wa yɩɩ Rĩma. A Rĩungã na n paa wakat fãa.’

La a Maari yeelame: ‘Mam nan pa tar sɩd ye. M na n maana wãn n dog biiga?’ T’a Gabriyɛll leok-a yaa: ‘A Zeova tõe bũmb fãa. A vʋʋsem sõngã na n waa fo zugu, tɩ fo rog bi-ribla. Fo kẽem a Elizabɛt me rɩka pʋga.’ Dẽ, a Maari yeelame yaa: ‘Mam yaa a Zeova tʋm-tʋm-poaka. Bɩ a sẽn yeelã fãa pidsi.’

 A Maari yikame n kẽng tẽng sẽn be tãmsẽ wã, n na n tɩ ges a Elizabɛte. A sẽn ta n pʋʋsã, biigã zĩnda a Elizabɛt pʋgẽ wã n virsi. A Zeova vʋʋsem sõngã kẽe a Elizabɛt t’a yeel yaa: ‘Maari, bɩ a Zeova ning-f barka. Mam paamame tɩ Mesi wã ma wa mam yirã.’ La a Maari yeelame: ‘Mam pẽgda a Zeova ne m sũur fãa.’ A Maari kell n paa a Elizabɛt nengẽ kiis a tãabo, n yaool n leb a yirã Nazarɛte.

A Zozɛf sẽn wa n bãng t’a Maari tara pʋga, a ra pa le rat t’a yɩ a pag ye. La a sẽn wa n gõe yʋngo, malɛk n gom ne-a zãmsd pʋgẽ n yeel-a yaa: ‘Ra bas a Maari ye. A pa maan bũmb sẽn yaa wẽng ye.’ Dẽ, a Zozɛf mara a Maari, n tall-a n kuil a zakẽ.