María katka se ichpoch akin nemia itech xolal Nazaret, ompa Galilea, uan katka ichankauj Elisabet. María yaya monamiktiti iuan se koujxijxinkej akin monotsaya José. Keman Elisabet kokoxkayetoya chikuasen metstiya, ángel Gabriel monextij iixpan María uan kiluij: “Tanesik, María, Jiova semi mitstatiochiuiani”. María amo kiajsikamatik tein Gabriel kiluij, yejua ika kimelauilij: “Timokokoxkataliti uan tikpias se okichpil. Moneki tiktokaytis Jesús. Yejua yeski tekiuaj, uan iTekiuajyo uejkauas nochipaya”.

María kijtoj: “Sayoj ke nejua amo nimotekani iuan se takat. ¿Keniuj uelis nikpias se konetsin?”. Gabriel kinankilij: “Jiova nochi ueli kichiua. Yektikatsin espíritu ualas motech, uan tikpias se okichpiltsin. Mochankauj, Elisabet, no kokoxkayetok maski semi xiuejya”. María kinankilij: “Nejua niitekitikauj Jiova. Maj notech mochiua tein tikijtoj”.

 María kikalpanoto Elisabet, akin nemia itech se xolal kampa tepeyoj. Keman ajsik, kitajpaloj, uan Elisabet kimachilij ke ikonetsin moolinij iijtik. Elisabet kiselij yektikatsin espíritu uan kijtoj: “María, Jiova mitstatiochiuij. Se ueyi tatiochiualis maj nechkalpanoki imomaj noTekotsin”. María kinankilij: “Nikueyitalia Jiova ika nochi noyolo”. Uan ompa mokauak iuan Elisabet eyi metsti uan satepan mokepak ichan, itech xolal Nazaret.

Keman José kimatik ke María kokoxkayetoya, amo kinekikok iuan monamiktis, porin kinemilij ke María kikajkayaujka iuan okse takat. Sayoj ke se ángel kiluij itech se takochitalis: “Amo ximoui timonamiktis iuan María. Yejua amo kichiuak tein amo kuali”. Yejua ika José monamiktij iuan María.