María okatka se ichpochtli tlen ochantiaya Nazaret itech ueyi altepetl Galilea. María okatka ikalchanejka Elisabet. Yimonamiktiskia iuan se kuajxinki tlen omotokayotiaya José. Ijkuak opoliuia eyi metstli para Elisabet kipiaskia ikonetsin, ángel Gabriel okimonextili María uan okilui: “Panolti María, Jehová sapanoa yomitsteochi”. María amo okajsikamatki tlen okilui, ik non, ángel Gabriel okiyekilui: “Tikpias se konetsintli. Uan moneki tiktokayotis Jesús. Ye tlanauatis uan iTekiuajkayo nochipa yetos”.

María okijto: “Ne amo keman nimoteka iuan se tlakatl. ¿Ken uelis nikpias nokone?”. Ángel Gabriel okinankili: “Jehová nochi ueli kichiua. Tikselis espíritu santo uan ijkon tikpias mokonetsin. Mokalchanejka Elisabet, noijki kipias se konetsintli”. María okijto: “Niitlakeual Jehová. Ma mochiua tlen otikijto”.

 María okitlajpaloto Elisabet itech se altepetl tlen okatka kanin tepeyo. Ijkuak María oajsito, okitlajpalo uan Elisabet okimachili omolini ikonetsin. Elisabet okiseli espíritu santo uan okijto: “María, Jehová yomitsteochi. Se ueyi tlateochiualistli onechtlajpaloko inantsin noTeko”. María okinankili: “Nikueyichiua Jehová ika nochi noyolo”. María omoka iuan Elisabet eyi metstli uan satepan omokuepki ikalijtik itech altepetl Nazaret.

Ijkuak José okimatki María kipiaskia ikonetsin, ayakmo okinekiaya iuan monamiktis. Pero se ángel okimonextili itech se kochtemikilistli uan okilui: “Amo ximomojti timonamiktis iuan ichpochtli. Ye amo okichi tlen amo kuali”. Ik non, José omonamikti iuan María uan okiuikak ichan.