Erizabheti wainga no hambzaji yake, yaidanijwa Maria, yaigara mu dhorobha ro Nazareta ku Garireya. Maria wainga wabatihwa ndi umwe muvezi waizwi Josefa. Erizabheti painga no mimba yo mweji mutandhatu, Ngirozi Gabrieri yakavia kuna Maria. Iyona yakati: ‘wakadini Maria? Wawana unyasha pamberi pa Jehovha.’ Maria aazivi kuzwisisa kuti ngirozi Gabrieri wainangenyi. Iyona yakamubvunja kuti: ‘Unozova no mimba zve wozobara mwana, unozomudura zina ro kuti Jesu. Acazova Mambo. Umambo hwake unozogara kwenda no kwenda.’

Maria wakati: ‘Ndiri mbhandwe. Ndingava kudini no mwana?’ Ngirozi yakati: ‘Akuna cicikakwanisiki kuna Jehovha. Mujimu Mucena unozobjuka kouri, zve unozova no mwana. Hambzaji yako Erizabheti anayovo mimba.’ Maria wakati: ‘Ndiri muranda wo kaji wa Jehovha. Ngazviitike kondiri kudari ngo kunanga kwenyu.’

 Maria wakaenda ku dhorobha kovona Erizabheti. Maria paakacungamija, Erizabheti wakazwa mwana mu ndani mwake ecitamba. Naazajwa ngo mujimu mucena, Erizabheti wakati: ‘Maria, Jehovha wakukomborera. I rukujo kwandiri kuva na Mai wa tenji wangu pa muzi pangu.’ Maria wakati: ‘Ndinosimba Jehovha ngo mwoyo wangu wese.’ Maria wakagara ka Erizabheti mweji mutatu, zve wakahwiria ku muzi kwake Nazareta.

Josefa paakaziva kuti Maria wainga no mimba, iyena waida kumuramba. Ngirozi ya Jehovha yakamubudirira mu hope yeciti: ‘Ucathya kurovora Maria. Apana cakashata cakaita.’ Ngo kudaro Josefa wakarovora Maria wopinda naye ku muzi.