Elízabeth bikʼéí łaʼ Mary wolyé, éí ániid naagháago Názareth Gáliliidi bighan. Mary éí Jóseph kin ííłʼíní bił ahaazhdootʼashgo bił ahazhdeetʼą́. Elízabeth hastą́ą́ nídeezid yiltsą́ądgo diyingo naalʼaʼí Géíbriyel Mary yichʼįʼ yitʼíní áʼdiilyaa. Éí ání: ‘Yáʼátʼééh Mary, Jiihóvah ílı̨́įgo naa nitsékees.’ Mary éí haʼátʼíí lá ní jinízingo baa tsízdeezkééz. Áádóó Géíbriyel áháłní: ‘Adíʼníiltsąąłgo ashkii dííłchííł, éí Jesus bee díízhiił. Éí Naatʼáanii nilı̨́įgo hooʼáał doo. BiNahatʼaʼ hoolʼáágóó hólǫ́ǫ doo.’

Mary ání: ‘Diné tʼahdoo shee haleeh da, haitʼéego awééʼ hodooleeł?’ Géíbriyel áháłní: ‘Jiihóvah tʼáá ałtsoní bá bohónéedzą́. Níłchʼi diyinii nikʼi hwiidooleełgo ashkii dííłchííł. Nikʼéí Elízabeth ałdóʼ yiiltsąąd.’ Áádóó Mary ání: ‘Jiihóvah bá naalʼaʼí nishłı̨́, bee háínídzíʼígíí bohodoonííł’.

 Mary éí kintahdi Elízabeth baazhníyá. Elízabeth kʼé bizhdííniidgo beʼawééʼ hideesʼnááʼ. Níłchʼi diyinii Elízabeth biiʼ hadéébįįdgo ání: ‘Mary, Jiihóvah nikʼi hasdliʼ, shiBóhólníihii bimá shaa níyáhígíí ayóó shił nílı̨́.ʼ Mary ání: ‘Shijéí tłʼááhdę́ę́ʼ Jiihóvah baa hashniih.ʼ Elízabeth baʼałkʼee jizdáago tááʼ nídeezid, áádóó Názarethgóó anídzoodzá.

Jóseph éí Mary yiiltsąądgo bił bééhoozingo, ałhaa jítʼááshígíí niʼ ázhdoolíiłgo tsízdeezkééz. Ndi nijiiyeełgo diyingo naalʼaʼí áháłní: ‘Mary tʼáadoo ádzaaí da, neʼasdzą́ą́ ádíílííł.ʼ Áko Jóseph éí Mary haghangóó bił aníjootʼáázh.