Elizaabeesi akaba aine omunyabuzaare muto orikwetwa Mariamu, owaabaire naatuura omu rurembo Nazareesi ey’omuri Galilaaya. Mariamu akaba agambirwe obugyenyi Yosefu, omubaizi. Elizaabeesi ku yaabaire aine enda y’ameezi mukaaga, maraika Gaburieli akabonekyera Mariamu. Akamugira ati: ‘Shemererwa munonga, Mariamu. Yehova naakukunda munonga.’ Taretegyereize eki Gaburieli yaabaire naamanyisa. Bwanyima akamugira ati: ‘Oryagira enda, ozaare omwana w’omwojo, kandi oryamweta Yesu. Aryategyeka nk’Omukama. Kandi Obukama bwe tiburihwaho.’

Mariamu akamugira ati: ‘Kwonka shi ka ntaine mushaija. Nimbaasa nta kuzaara omwana?’ Gaburieli akamugarukamu ati: ‘Ahari Ruhanga tihariho ekirikurema. Noija kutunga omwoyo gurikwera, kandi ozaare omwana w’omwojo. Elizaabeesi omunyabuzaare waawe nawe aine enda.’ Bwanyima Mariamu akamugira ati: ‘Ndi omuzaana wa Yehova. Kimbeho nk’oku waagamba.’

 Mariamu akaza omu rurembo kutaayaayira Elizaabeesi. Mariamu ku yaaramukize Elizaabeesi, omwana omunda ya Elizaabeesi yaayehindura. Elizaabeesi arikuhwerwa omwoyo gurikwera, akagira ati: ‘Yehova akuhaire omugisha, Mariamu. Ogu n’omugisha gw’amaani nyina wa Mesia kuntaayaayira.’ Mariamu akamugarukamu ati: ‘Omutima gwangye niguhimbisa Yehova.’ Mariamu akaguma na Elizaabeesi kumara ameezi ashatu, bwanyima akagaruka Nazareesi.

Yosefu ku yaamanyire ngu Mariamu aine enda, akaba naayenda kwanga kumugamba obugyenyi. Kwonka maraika akamubonekyera omu kirooto yaamugira ati: ‘Otatiina kutwara Mariamu. Tihaine ekibi eki akozire.’ N’ahabw’ekyo Yosefu akatwara Mariamu omuka yaaba omukazi we.