69 KAQ YACHACHIKUY
Mariaman angel Gabriel watukusqanmanta
Maria sipasqa Nazaret llaqtapim yacharqa, payqa Joseywanmi rimarurqakuña casarakunankupaq. Huk punchawmi ayllun Elisabet suqta killa wiksayuqña kachkaptin Diospa angelnin Gabrielqa Mariata nirqa: “Rimaykullaykim Maria, Jehova Diosmi akllaykusunki”, nispa. Imanasqa chaynata rimapayasqanmanta yachananpaqmi Mariata nirqa: “Wiksayakuspaykim qari wawata wachakunki. Sutinmi kanqa Jesus, payqa wiñaypaq kamachiqmi kanqa”, nispa.
Chaymi Maria nirqa: “Manaraq qariwan puñuchkaspayqa, ¿imaynataq wawayuqqa kayman?”, nispa. Hinaptinmi angel Gabriel nirqa: “Jehova Diospa chuya espiritunwanmi qamqa wiksayakunki. Aylluyki Elisabetpas yuyaq kayninpiñam wiksayuq kachkan”, nispa. Chaymi Mariaqa nirqa: “Diospa makinpim kani, rimasqaykiman hinayá kachun”, nispa.
Chaymantam Mariaqa Elisabetta watukurqa. Chayaruspan Maria rimakuykuptinmi Elisabetpa wiksanpi wawa kuyurirurqa. Hinaptinmi Elisabetqa Diospa chuya espiritun huntaykuptin nirqa: “Maria qamtam Dios bendeciykusunki. ¿Pitaq ñuqaqa kani señorniypa maman ñuqaman watukamuwananpaqqa?”, nispa. Mariañataqmi nirqa: “Tukuy sunquywanmi Jehova Diosta hatunchani”, nispa. Mariaqa kimsa killamantam wasinman kutikurqa.
Joseyñataqmi Maria wiksayuq kasqanta yacharuspan casarakuyta manaña munarqachu, chaymi musquyninpi Diospa angelnin nirqa: “Ama manchakuychu casarakuytaqa. Mariaqa manam huchallikurqachu”, nispa. Chaynapim Joseyqa Mariawan casarakurqa.
‘Cielokunapipas, kay pachapipas Jehova Diosqa tukuy munasqantam ruwan’ (Salmo 135:6).