I Marija sine familija e Elisavetake. Oj sine terni hem živinela sine ki diz Nazaret ki Galileja. I Marija sine verimi e Josifeske, kova so sine stolari. Keda i Elisaveta sine khamni šov masek, o angeli o Gavriel pojavingja pe e Marijake. Ov pozdravingja la hem vakergja lake: „O Jehova sikavgja tuke bari milost, Marija“. Oj na halili so manglja te vakerel o Gavriel. Adaleske ov vakergja lake: „Ka ačhove khamni hem ka bijane murš hem ka čhive leskoro anav Isus. Ov ka vladinel sar Cari, hem leskoro Carstvo ka trajnel zasekogaš“.

I Marija vakergja: „Ama me panda na sium ženimi. Sar šaj te ovel man čhavo?“ O Gavriel odgovoringja lake: „O Jehova šaj sa te kerel. O sveti duh ka pomožinel tuke te ovel tut čhavo. Tli familija i Elisaveta isto agjaar ačhili khamni“. Tegani i Marija phengja leske: „Me sium e Jehovaskiri robinka. Neka ovel sar so vakergjan“.

 I Marija geli ki jekh diz ko planine te posetinel e Elisaveta. Keda reslja i Marija ki late hem pozdravingja la, i Elisaveta osetingja kaj o bebe mrdingja. Tegani pherdili sveti duh hem vakergja lake: „Marija o Jehova but blagoslovingja tut. Kobor bari čest isi man so e Mesijaskiri daj ali ki mande!“ I Marija vakergja: „Celo vilea falinava e Jehova“. Oj ačhili ki Elisaveta trin masek, hem palo adava irangja pe khere ko Nazaret.

Keda vakergja i Marija e Josifeske kaj tani khamni, ov na manglja više te lel la romnjake. Ama, jekh angeli pojavingja pe leske ko suno hem vakergja leske: „Ma dara te le tut laja. Oj na kergja ništo lošno“. Tegani o Josif ženingja pe e Marijaja.