I Marija hem i Jelisaveta hine familija. Oj hine terni hem živindža ki diz Nazaret ki Galileja. I Marija hine verimi e Josifeja, kova hine stolari. Ked i Jelisaveta hine khamni šov masek, o anđeo o Gavrilo pojavindža pe e Marijače. Ov pozdravindža la hem phendža lače: „Marija, o Jehova mothovdža tuče bari milost.“ Oj na haljilji ko so o Gavrilo mislindža. Odoljese ov phendža lače: „Ka ačhove khamni hem ka bijane murše hem ka čhive oljeso nav Isus. Ov ka vladini sar Kralj hem oljeso Kraljevstvo večno ka trajini.“

I Marija phendža: „Ama me pana na hijum dindi ko rom. Sar šaj te ovel man čhavo?“ O Gavrilo odgovorindža lače: „O Jehova sa šaj te čerel. O sveti duh ka avel upro tute hem tu ka ovel tut čhavo. Tiklji rođaka i Jelisaveta, isto adžahar ačhilji khamni.“ Tegani i Marija phendža ljese: „Me hijum e Jehovasi robinja. Nek ovel sar so vačerdžan.“

 I Marija dželji ki jekh diz koja hine ko bregija te posetini e Jelisaveta. Ked i Marija reslja koro late hem pozdravindža la, i Jelisaveta osetindža so i beba mrdindža ko olako vodži. Tegani pherdilji sveto duhoja hem phendža lače: „Marija, o Jehova but blagoslovindža tut. Kobor bari čast isi man so e Mesijasi daj alji koro mande!“ I Marija phendža: „Celone viljeja hvalinava e Jehova.“ Oj ačhilji ki Jelisaveta trin masek hem palo odova irindža pe čhere ko Nazaret.

Ked i Marija phendža e Josifese soj tani khamni, ov na manglja više te ženini pe olaja. Ama, jekh anđeo pojavindža pe ljese ko suno hem phendža ljese: „Ma dara te ženine tut olaja. Oj na čerdža ništa lošno.“ Tegani o Josif ženindža pe e Marijaja.