И Елизавета родо ла Марияти. И Мария жувэлас андэ Галилея, андо форо Назарето. Латэ сас тэрно, савэс ақарэнас Иосифо. Во бут бути терэлас анда каш. Сар прожыля епаш бэрш после кода, сар и Елизавета заԥирдя, о анӷело о Гавриило авеля каринг и Мария. Во ԥэндя: «Доров Мария. О Иегова фартэ шутя бари сама пэр тутэ». Но и Мария на поля, со ԥэндя о Гавриило. Тоди во росԥэндя: «Ту заԥирэса и тутэ арақадёлапэ шаво, савэсти ту приԥэнэса Иисусо. Во авэла царё и лэско царство авэла вечно».

И Мария ԥэндя: «Но мэ же най миростэ. Сар мандэ тэ арақадёлпэ бэято?» О Гавриило ԥэндя: «О Иегова вся стерэла. Во дэла пэско свынто духо и тутэ авэла бэято. Кай и Елизавета, сави тути родо, кадяжэ трэбуй тэ авэл о бэято, хоть вой уже ԥури». Пэ када и Мария ԥэндя: «Мэ лэ Иеговасти рабыня. Мэк авэла вся кадя, сар ту ԥэндян».

 И Мария жыля тэ диқэл ла Елизавета, сави жувэлас котэ, кай сас и плая. Кала и Мария ԥэндя «доров» ла Елизаветати, и Елизавета ашундя, сар андэр латэ о бэято подхукля. О Иегова дя пэско свынто духо ла Елизаветати и тоди вой ԥэндя: «Мария, о Иегова блаӷословисардя тут. Сар мэ радо, кай лэ Христости дэй авеля каринг мандэ андо цэр». И Мария ԥэндя: «Мэ анда вся оди слависарав лэ Иеговас». И Мария сас кай и Елизавета трин шон, ай тоди рисайля цэрэ андо Назарето.

Кала о Иосифо уӷангля, кай ла Мариятэ трэбуй тэ авэл бэято, во закамля тэ отԥэндёлпэ лэ ябьявэстар. Во гиндосардя, кай ла Мариятэ трэбуй тэ авэл бэято аврэ муршэстар. Но андо суно о анӷело ԥэндя лэсти: «На дар тэ жениспэ пэр латэ. Вой на стердя нисаво найлашимос». Тоди о Иосифо женисайля пэр латэ и вонэ линэ тэ жувэн андэ лэско цэр.