Sa iai se tauaiga talavou o Elisapeta e igoa iā Maria. Na nofo o ia i le aai o Nasareta i Kalilaia. Na faamau Maria ma Iosefa le kamuta. Ina ua ono masina le maʻitaga o Elisapeta, ona faaali mai lea o le agelu o Kaperielu iā Maria. Na ia faapea mai: ʻMalo lava iā te oe Maria. Ua matuā alofateleina oe e Ieova.’ E leʻi malamalama Maria i le uiga o le faamatalaga a Kaperielu. Ona toe faapea mai lea o Kaperielu: ʻO le a e tō ma e fanauina mai se tama tama, ma e tatau ona e faaigoa o ia iā Iesu. O le a pule o ia o se Tupu. E tumau e faavavau lona Malo.’

Na tali atu Maria: ʻO aʻu o se taupou. E faapefea ona ou fanauina se tama?’ Na faapea mai Kaperielu: ʻE leai se mea e faigatā iā Ieova. E iā te oe le agaga paia ma o le a e fanauina mai se tama tama. Ua tō foʻi lou tauaiga o Elisapeta e ui ua loomatua o ia.’ Ona fai atu lea o Maria: ʻO aʻu o le teine pologa a Ieova. Ia faia iā te aʻu le mea ua e folafolaina mai.’

 Na alu Maria i se aai i luga o atumauga e asiasi iā Elisapeta. Ina ua faafeiloaʻi e Maria Elisapeta, ona osooso ai lea o le pepe o loo i le manava o Elisapeta. Ua faatumuina Elisapeta i le agaga paia, o lea na ia faapea atu ai: ʻMaria, ua faamanuia oe e Ieova. O se faaeaga le iai o le tinā o loʻu Alii i loʻu fale.’ Na tali Maria: ʻOu te vivii atu iā Ieova ma loʻu lotoatoa.’ Na nofo Maria iā Elisapeta mo masina e tolu, ona toe foʻi ai lea o ia i lona aiga i Nasareta.

Ina ua iloa e Iosefa ua tō Maria, na manaʻo o ia e tatala le la faamau. Peitaʻi na faaali mai iā te ia se agelu e ala i se miti ma faapea mai: ʻAua e te fefe e faaipoipo iā te ia. E na te leʻi faia se mea sesē.’ O lea, na ave ai loa e Iosefa Maria i lona aiga ma fai ma ana avā.