Elizabete baadi na nsogwakashi a mu kifuko kyaye abetanyina bu Maadiya, baadi mushaale mwiumbo dya Naazarete mu Ngalileeya. Maadiya abaadi bamubangile bulunda kwi Yoosefe, muntu baadi asèe mabaaya. Pabadi Elizabete mukumbashe myeshi isamombo n’eyimi, mwikeyilu Gabryele baadi mufikye kwi Maadiya. Amulungula shi: ‘Nakwimuna Maadiya. Obe abadi belele mwabi kwi Yehowa.’ Tabaadi mushingule kibaadi akyamba Mwikeyilu Gabryele nya. Aye nkumulungula shi: ‘Okayimita eyimi, okatanda mwana mulume, omuudikye eshina bu Yesu. Akamunana bu Nfumu. Bufumu bwaye abukeekala bwa looso.’

Anka Maadiya bambile shi: ‘Tanguukile mulume nya. Nakatanda mwana naminyi?’ Gabryele nkumulungula shi: ‘Ta kwi kintu kya kukambila Yehowa nya. Kikudi kiselele akikafiki koodi, akupu okapete mwana. Mukwenu Elizabete e n’eyimi namu.’ Maadiya nkwakula shi: ‘Ne mufubi a Yehowa. Byooso bikitshikye bu bibwamba.’

 Maadiya nkwenda kwiumbo dya myengye mu kutembela Elizabete. Pabaadi Maadiya mumwimune, Elizabete bapushile mwana asaana munda mwaye. Aye nkuula na kikudi kiselele p’aye kwakula shi: ‘Maadiya, Yehowa bakwelela mwabi. Nyi ntumbo ikile pa kupeta nyinaaye na Nfumwami kwande.’ Maadiya nkwamba shi : ‘Eshimba dyande aditumbisha Yehowa.’ Maadiya bashaalele na Elizabete myeshi isatu, akupu aye nkwalukiila ku Nazarete.

Pabaadi Yoosefe mupushe shi Maadiya e n’eyimi, bakimbile kuleka kuyiila Maadiya. Anka mwikeyilu nkumumwekyela mu kilootwa na kumulungula shi: ‘Totshinanga kumwibakila. Tamukite kintu kibubi nya.’ Yoosefe nkwata Maadiya bu mukashi nkamutuula ku nshibo yaaye.