Elisabet ben abi wan famiriman di ben nen Maria. Maria ben de wan yongu uma di ben e libi na ini a foto Nasaret na ini Galilea. A ben meki mofo nanga a temreman Yosef fu trow nanga en. Di Elisabet ben de nanga bere siksi mun kaba, na engel Gabrièl go na Maria. A taki: ’Odi Maria. Yehovah gi yu bigi grani.’ Maria no ben e frustan san Gabrièl ben wani taki. Ne Gabrièl taigi en: ’Yu o kon de nanga bere èn yu o kisi wan manpikin. Yu musu kari en Yesus. A o tiri leki Kownu. En Kownukondre o tan fu têgo.’

Maria taki: ’Ma mi no sribi nanga wan man ete. Fa mi kan kisi wan pikin dan?’ Gabrièl piki en: ’Yehovah man du ala sani. Santa yeye o kon na yu tapu èn yu o kisi wan manpikin. Yu famiri Elisabet kon de nanga bere tu, aladi a owru kaba.’ Dan Maria taki: ’Mi na a umasrafu fu Yehovah. Meki sani pasa nanga mi soleki fa yu taki.’

 Maria go luku Elisabet di ben e tan na ini wan foto na a bergikontren. Di Maria gi en odi, Elisabet firi taki a beibi na ini en bere dyompo. Santa yeye kon na Elisabet tapu. Elisabet taki: ’Maria, Yehovah blesi yu. A de wan grani fu abi a mama fu a Mesias na ini mi oso.’ Maria taki: ’Mi e prèise Yehovah nanga mi heri ati.’ Maria tan nanga Elisabet dri mun langa. Baka dati a drai go na en oso na Nasaret.

Di Yosef yere taki Maria ben de nanga bere, a no ben wani trow nanga en moro. Ma wan engel kon na en na ini wan dren, dan a taki: ’No frede fu trow nanga Maria. A no du nowan ogri.’ Sobun, Yosef trow nanga Maria.