Elisabetu yange lu a anmgbian u kwase u kiriki, iti na ér Maria. Maria lu hen geri u Nasareti, ken ipaventar u Galilia. Orkapinta ugen, iti na ér Yosev, lu sôôr Maria. Elisabetu lu iyav ka kuman iwer ataratar yô, ortyom Gaberiel za ande hen Maria. A kaa a na ér: ‘M sugh u Maria. Yehova na u iveren kpishi.’ Kpa Maria kav kwagh u ortyom la ôr a na la ga. Tsô Gaberiel kaa a na ér: ‘U wa iyav, u mar wan u nomso, nahan u ii un iti wer Yesu. Una lu Tor. Shi Tartor na ua lu gbem sha won.’

Maria gema kaa ér: ‘M ngu a yav a or ga. Nahan a er nan ve me mar wana?’ Gaberiel kaa a na ér: ‘Kwagh môm u hemban Yehova ngu ga. Icighan jijingi una sen sha a we, nahan u mar wan. Anmgbian wou Elisabetu kpa ngu yav, er a bee iyol nahan kpaa.’ Tsô Maria kaa ér: ‘Mo m ngu kpankwase u Yehova. Yô kwagh ne a erem, vough er u kaa nahan.’

 Yange Maria za hen geri ugen hen ijiir i lun agungu agungu, u za nengen a Elisabetu. Maria za kenden sughun Elisabetu yô, wan tsuwe Elisabetu ken uya je Elisabetu fa. Er Elisabetu iv a icighan jijingi yô, a kaa ér: ‘Maria, Yehova na u iveren kpishi. Mve u ngô u Terem a ve hen ya wam ne tese icivir kpishi.’ Maria gema kaa a na ér: ‘M ngu sughun Yehova a ishima yam cii.’ Maria tsa vea Elisabetu iwer itiar, maa hide yem hen ya na, ken Nasareti.

Yosev va fe ér Maria wa iyav yô, a soo u undun Maria. Kpa ortyom ugen va ande hen Yosev ken mnya, kaa a na ér: ‘I de cier we iyol u vôson Maria ga. A er ma kwaghbo ga.’ Tsô Yosev vôso Maria, va a na ken ya na.