Elizabɛtɛ aki la kosɛnde ka womoto lokombo lande Mariya ndo nde akadjasɛka l’osomba wa Nazarɛtɛ la Ngalileya. Mariya akambemɛ le Yɔsɛfu, laki otshudi w’abaya. Lam’aki diemi dia Elizabɛtɛ diaya ngɔndɔ shamalo, ondjelo Ngabriyɛlɛ akaye le Mariya. Nde akate ate: ‘He mɔyɔ, Mariya. Wɛ ambohomɔ lokolo l’ɔlɔlɔ efula lo washo wa Jehowa.’ Mariya koshihodia kɛnɛ kakalange mbuta Ngabriyɛlɛ. Ko Ngabriyɛlɛ akawotɛ ate: ‘Wɛ ayotshɔ diemi ndo ayota ɔna pami ndo kowɔlɛ Yeso. Nde ayolɛ oko nkumekanga. Diolelo diande diayotshikalaka pondjo pondjo.’

Mariya akate ate: ‘Dimi leke emuma. Ngande wakokami mbota?’ Ngabriyɛlɛ akate ate: ‘Ndooko dui diahakoke salema le Jehowa. Nyuma k’ekila kayoya le yɛ ndo wɛ ayota ɔna. Elizabɛtɛ w’owotɔ ayɛ nde la wɔ aya la diemi.’ Ko Mariya akate ate: ‘Okambi wa Jehowa wa womoto mbemi. Diasaleme le mi oko woditshiyɛ.’

 Mariya akatshu l’osomba wa l’akona dia tenda Elizabɛtɛ. Etena kakawosha Mariya mɔyɔ, Elizabɛtɛ akoke ɔna lele l’otema ande akundjɔkundjɔ. Oko wakandalodiama la nyuma k’ekila, nde akate ate: ‘Mariya, Jehowa ambokɔtshɔkɔla. Ekɔ tshondo ya nɛmɔ le mi dia nyango nkumɛmi ndja lo luudu lami.’ Mariya akate ate: ‘Lambotombola Jehowa l’otema ami tshɛ.’ Mariya akatshikala la Elizabɛtɛ ngɔndɔ shato, ko nde akakalola la Nazarɛtɛ.

Lam’akeye Yɔsɛfu dia Mariya aya la diemi, nde akayange dia nkakitɔna la nde. Koko ondjelo akɛnama le nde lo dɔ ndo akawotɛ ate: ‘Tokake wɔma dia ntshuka Mariya. Ndooko dui dia kɔlɔ diosadinde.’ Ko Yɔsɛfu akatshuke Mariya ndo akawela lo luudu lande.