Elizabeti wenga ndi mubali waki zina laki Mariya yo wajanga mutawuni ya Nazarete ku Galile. Mariya wenga pafupi kutolana ndi Yosefe yo wenga kalipentala. Pa nyengu yo Elizabeti wenga ndi nthumbu ya myezi 6, mungelu Gabriele wanguza kwaku Mariya. Iyu wangukamba kuti: ‘Timoneni Mariya. Yehova wakuyanja ukongwa.’ Mariya wanguziŵa cha vo Gabriele wang’anamuwanga. Iyu wanguti: ‘Ujengi ndi nthumbu ndipu ubalengi mwana munthurumi. Mwana mwenuyu utenere kuzimudana kuti Yesu. Iyu wazamulamuliya nge Fumu. Ufumu waki wazamumala cha.’

Mariya wangukamba kuti: ‘Ndechendagonanepu ndi munthurumi. Kumbi ndingaja wuli ndi mwana?’ Gabriele wangumuka kuti: ‘Palivi cho chingamutonda Yehova. Mzimu utuŵa uzengi paku iwi ndipu ujengi ndi mwana munthurumi. Elizabeti mubali waku nayu, we ndi nthumbu chinanga kuti ngwakukota.’ Pavuli paki Mariya wanguti: ‘Ndini kapolu munthukazi waku Yehova. Vichitiki kwaku ini nge mo mwakambiya.’

 Mariya wanguluta ku tawuni yo yenga ku mapiri kuti wakawoni Elizabeti. Iyu wati watawuzga Elizabeti wanguvwa mwana wachihuruka mumoyu mwaki. Mzimu utuŵa wati waza paku Elizabeti, wangukamba kuti: ‘Mariya, Yehova wakutumbika. Ndatumbikika kulonde anyina aku Mesiya munyumba mwangu.’ Mariya wangumuka kuti: ‘Ndithamika Yehova ndi mtima wangu wosi.’ Iyu wanguja ndi Elizabeti kwa myezi yitatu ndipu wanguwere kwawu ku Nazarete.

Yosefe wati waziŵa kuti Mariya we ndi nthumbu wakhumbanga kuleka kumuto. Kweni mungelu wangumuziya ku malotu ndi kumukambiya kuti: ‘Ungawopanga cha kumuto. Palivi chiheni cho wachita.’ Mwaviyo, Yosefe wangutolana ndi Mariya ndipu wanguluta nayu kumuzi kwaki.