Ja Elisabet waj jun spamilya jun akʼix sbʼiʼil María bʼa ti ajyi kulan bʼa chonabʼ Nazaret, bʼa Galilea. Ja María oj nupanuk sok jun kalpintero sbʼiʼil José. Yajni wakexa ixaw mixa lek ayuk ja Elisabet, ja anjel Gabriel jak sjeʼ sbʼaj soka María. Ja anjeli yala: «Saʼan, María, ja Jyoba stsaʼawata». Ja yeʼn mi yabʼ stojolil ja jas yala ja Gabriel. Tixa xcholo ja anjeli: «Oj maloʼaxan sok oj ajyuk juna wal. Oj wa sbʼiʼiluk Jesús. Oj kʼot mandaranum, soka smandaraneli oj albʼuk tolabida».

Jaxa María yala: «Pe ja keʼn solteraʼon. ¿Jastal oj bʼobʼ ajyuk jun kal?». Ja Gabriel sjakʼayi: «Ja Jyoba wa xbʼobʼ skʼuluk spetsanil. Oj koʼuka bʼaj ja yip ja Dyosi, sok oj ajyuk juna wal. Jawa wats Elisabet, ojxa ajyuk jun yal». Anto ja María sjakʼa: «Kʼotelon yaʼtijum ja Jyoba. A-skʼulki ja jastal awalunej».

 Ja María waj yulatay ja Elisabet, bʼa jun chonabʼ wa xtax bʼa bʼujanik wits. Yajni kʼoti, yayi dyos, jaxa Elisabet yabʼ snika sbʼaj ja yal alats tey bʼa yoj slukumi. Ja yeʼn koʼ sbʼaj ja yip ja Dyosi sok yala: «María, ja Jyoba yaʼunej koʼuka lekilal. Jun niwan cholal jakel yulatayon bʼa jnaj ja snan ja Kajwali». Ja María sjakʼa: «Wa xtoyo ja Jyoba sok spetsanil jkʼujol». Ti kan oxe ixaw soka Elisabet sok tixa kumxi bʼa Nazaret.

Yajni yabʼ ja José bʼa mixa lek ayuk ja María, mixa skʼana oj nupanuksok. Pe jun anjel jak yalyabʼ ja José bʼa jun swayich: «Mok xiwan ja oj nupanan soka María. Mini sleʼunejuk smul». Ja yuj ja José nupani soka María sok yiʼaj och bʼa snaj.