María chatum tsumat tiku xlama kNazaret, nema xtapakgsi kʼGalilea chu xfamilia xwanit Elisabet. María xʼama tatamakgaxtokga chatum xwakna tiku xwanikan José. Akxni Elisabet akgchaxan papaʼ xkgalhi lata xkgalhkgalhima kskgata, ángel Gabriel tasiyanilh María chu wanilh: “Tlen María, Jehová lu tlan akxilhan”. María ni akgatekgsli tuku Gabriel wanilh, wa xlakata Gabriel liwana wanilh: “Nakgalhiya chatum aktsu kgawasa. Nalimapakuwiya Jesús. Mapakgsina nalitaxtu chu xTamapakgsin nikxni katisputli”.

María wa: “Pero akit kaj tsumat. ¿La nakkgalhi chatum aktsu skgata?”. Gabriel kgalhtilh: “Nitu tuku Jehová nila tlawa. Espíritu santo nalitatsamayan chu nakgalhiya chatum aktsu kgawasa. Mintalilakgapasni Elisabet, na nakgalhi aktsu skgata”. Wa xlakata María kgalhtinalh: “Akit kskujni Jehová. Chuna kakgantaxtulh kimpalakata la wanti”.

 María alh lakgapaxialhnan Elisabet kkachikin nema xwi kkasipijni. Akxni María chaʼalh chu pakgachipalh, Elisabet makgkatsilh pi tasakgalilh kskgata kxpulakni. Elisabet litatsamalh espíritu santo chu wa: “María, Jehová sikulunatlawanitan. Akgtum lanka talakgalhaman pi minit kilakgapaxialhnan kkinchik xtse kiMalana”. María kgalhtilh: “Kmalanki Jehová xliputum kinaku”. Tatamakgxtakgcha Elisabet akgtutu papaʼ chu alistalh taspitli kxchik kNazaret.

Akxni José katsilh pi María xʼama xkgalhi aktsu skgata, nialh xtatamakgaxtokgputun. Pero chatum ángel tasiyanilh kxtamanixni chu wanilh: “Ni kapekuanti natatamakgaxtokga María. Nitu tlawama tuku nitlan”. Wa xlakata José tatamakgaxtokgli María chu lilh kxchik.