Elisabet i gat wanpela yangpela wanblut, nem bilong em Maria, em i stap long taun Nasaret long Galili. Ol i makim Maria long maritim Josep, em wanpela kapenta. Elisabet i gat bel inap 6-pela mun, long dispela taim ensel Gebriel i kamap long Maria. Em i tok: ‘Gude, Maria. Jehova i amamas long yu.’ Em i no klia wai na Gebriel i tok olsem. Em i tokim em: ‘Yu bai gat bel na karim wanpela pikinini man, na yu mas givim nem Jisas long em. Em bai stap King. Kingdom bilong em bai stap oltaim oltaim.’

Maria i tok: ‘Mi no bin slip wantaim wanpela man. Hau bai mi gat pikinini?’ Gebriel i tok: ‘Olgeta samting God i tokaut bai kamap tru. Holi spirit bai kam stap long yu, na yu bai karim wanpela pikinini man. Wanblut bilong yu Elisabet tu i gat bel.’ Na Maria i tok: ‘Mi wokmeri bilong Jehova. Samting yu tok long en i ken kamap long mi.’

 Maria i go long wanpela taun long ples maunten bilong lukim Elisabet. Taim Maria i tok gude, Elisabet i pilim bebi i stap long bel bilong em i kalap. Holi spirit i pulap long Elisabet, na em i tok: ‘Maria, Jehova i blesim yu. Gutpela samting i kamap long mi, mama bilong Bikpela bilong mi i kam lukim mi.’ Maria i tok: ‘Mi preisim Jehova long bel olgeta bilong mi.’ Maria i stap wantaim Elisabet inap 3-pela mun, na bihain em i go long asples bilong em long Nasaret.

Taim Josep i painimaut olsem Maria i gat bel, em i laik lusim Maria. Tasol long driman wanpela ensel i kamap long Josep na tok: ‘No ken pret long maritim em. Em i no mekim wanpela rong.’ So Josep i kisim Maria olsem meri bilong em na bringim Maria i go long haus bilong em.