Erisabesi akaba aine omunyabuzaale omuto ayayetwaga Malyamu, ayaikaraga omu rubuga Nazalesi orwa Galiraya. Malyamu akaba ajumbiirwe Yusufu ayakoraga nk’omubaizi. Enda ya Erisabesi obu yahikize emyezi mukaaga, maraika Gabiryeri akabonekera Malyamu. Akamugambira ati: ‘Mirembe Malyamu. Yahwe akuhaire omugisa.’ Malyamu atetegereze amakuru g’ebigambo bya maraika Gabiryeri. Maraika Gabiryeri akamugambira ati: ‘Noija kutwara enda, ozaale omwana w’obwojo kandi osemeriire kumuruka ibara Yesu. Naija kulema nk’Omukama kandi Obukama bwe nibwija kwikaraho ebiro n’ebiro.’

Malyamu akamugarukamu ati: ‘Baitu kantakabyamahoga n’omusaija. Ndasobora nta kuzaara omwana?’ Gabiryeri akamugarukamu ati: ‘Busaho kintu kyona ekisobora kulema Yahwe. Omwoyo ogurukwera nigwija kukwijaho nukwo osobole kutwara enda. Omunyabuzaale wawe Erisabesi nauwe atwaire enda.’ Hanyuma Malyamu akamugambira ati:  ‘Nyowe ndi muzaana wa Yahwe. Leka kimbeho nk’oku ogambire.’

Malyamu akagenda omu rubuga orukaba ruli omu nsozi kubungira Erisabesi. Malyamu obuyaramukize Erisabesi, Erisabesi akahurra omwana ow’omunda ye naguruka. Habw’omwoyo ogurukwera, Erisabesi akagamba ati: ‘Malyamu, Yahwe akuhaire omugisa. Mugisa gw’amaani kuba na nyina Omukama omu ka yange.’ Malyamu akamugarukamu ati: ‘Ninsiima Yahwe n’omutima gwange gwona.’ Malyamu akaikara na Erisabesi kumara emyezi esatu, hanyuma yagaruka Nazeresi nambere yaikaraga.

Yusufu obuyakyetegeriize ngu Malyamu aine enda, akagonza kumuleka. Baitu maraika akamubonekera omu kirooto yamugambira ati: ‘Otatiina kumuswera. Taine kibi kyona ekyakozere.’ Nahabweki, Yusufu akaikiriza yaswera Malyamu kandi yamutwara n’omu ka ye.