Елисаветаның Мария дээр аныяк төрели Галилеяның Назаретке чурттап чораан. Марияны Иосиф дээр бызаңчы кижи-биле дүгдеп кааш турган. Елисавета иштели берген соонда, чартык чыл эрткенде, Гавриил дээр ангел Марияга келгеш: «Экии, Мария. Иегова сенче тускай кичээнгей салган-дыр» — дээн. Ынчалза-даа Мария чугааның утказын билбээн. Ынчан ангел аңаа: «Сен иштели бергеш, оол божуп алгаш, ону Иисус деп адап алыр сен. Ол Хаан болур. Ооң Чагыргазы кезээ-мөңгеде боор» — деп чугаалаан.

«Мен ашак чок кижи канчап төл божуп алыр мен?» — деп, Мария айтырган. Гавриил аңаа: «Сен эр кижиден эвес, а ыдыктыг сүлдениң дузазы-биле иштели бээр сен. Иегованың кылып шыдавазы чүве чок. Елисавета төрелиң база иштиг» — деп харыылаан. Мария аңаа: «Мен Иегованың чалчазы-дыр мен. Сээң чугаалааның дег болзун» — дээн.

 Мария даглыг черде чурттап турар Елисаветаже аалдап чорупкан. Ооң бажыңынче кирип келгеш, Мария мендилежиптери билек, Елисаветаның иштинде төл шимчеп эгелээн. Елисавета ыдыктыг сүлдеге бүргеткеш: «Мария, Иегова сени йөрээген-дир! Мээң бажыңымга Мессияның авазы келгени дээш дыка өөрүп тур мен!» — дээн. «Мен Иегованы бүгү сеткилимден алдаржыдар-дыр мен» — деп, Мария чугаалаан. Мария Елисаветаның бажыңынга үш ай ишти аалдааш, дедир Назаретче чаныпкан.

Марияны иштиг деп билип кааш, Иосиф аңаа өгленмес деп барган. Ол ону өске кижиден иштиг деп бодаан. Ынчалза-даа Иосифтиң дүжүнге ангел: «Марияга өглениринден кортпа. Ол багай чүү-даа кылбаан» — дээн. Оон олар өгленип алгаш, Иосифтиң бажыңынга чурттап эгелээн.