Elisabetha o vha e na muṅwe musidzana wa shaka ḽawe we a vha a tshi pfi Maria, we a vha a tshi dzula muḓini wa Nazareta kha ḽa Galilea. Maria o vha o fulufhedziswa u vhingiwa nga Yosefa wa muvhaḓi. Musi Elisabetha e na miṅwedzi ya rathi o vhifha muvhilini, muruṅwa Gabriele o bvelela kha Maria. A ri: ‘Ndi masiari, Maria. Yehova o ni fhaṱutshedza vhukuma.’ Maria a si pfesese zwe Gabriele a vha a tshi khou amba zwone. Gabriele a mu vhudza a ri: ‘Ni ḓo vhifha muvhilini na beba ṅwana wa mutukana nahone u fanela u pfi Yesu. U ḓo vhusa sa Khosi. Muvhuso wawe ndi wa lini na lini.’

Maria a ri: ‘Fhedzi a thi athu u ita zwa vhudzekani. Ndi nga vha hani na ṅwana?’ Gabriele a ri: ‘A huna tshine Yehova a si tshi kone. Muya mukhethwa u ḓo ḓa kha inwi, nahone ni ḓo vha na ṅwana wa mutukana. Elisabetha shaka ḽaṋu na ene o vhifha muvhilini.’ Ndi hone Maria a tshi ri: ‘Nṋe ndi mushumeli wa Yehova. Zwe na amba kha zwi itee kha nṋe.’

 Maria a ya muḓini wa dzithavhani u dalela Elisabetha. Musi Maria a tshi mu lumelisa, Elisabetha a pfa ṅwana nga ngomu hawe a tshi tamba-tamba. O ḓala muya mukhethwa, a ri: ‘Yehova o ni fhaṱutshedza Maria. Ndi pfa ndo huliswa u dalelwa hayani hanga nga mme a Murena wanga.’ Maria a ri: ‘Ndi renda Yehova nga mbilu yanga yoṱhe.’ Maria a dzula na Elisabetha miṅwedzi miraru nahone nga murahu a vhuyelela hayani Nazareta.

Musi Yosefa a tshi pfa uri Maria o vhifha muvhilini, a ṱoḓa u litsha u mu vhinga. Fhedzi muruṅwa a bvelela khae muḽoroni a ri: ‘Ni songo ofha u mu vhinga. A huna tshe a tshinya.’ Yosefa a vhinga Maria a vha mufumakadzi wawe nahone a mu ḓisa hayani hawe.