Hi Elizabeth may batan-on nga paryente nga an ngaran Maria, nga naukoy ha syudad han Nazaret ha Galilea. Hirani na ikasal hi Maria kan Jose nga usa nga panday. Ha ikaunom ka bulan han pagburod ni Elizabeth, nagpakita kan Maria hi anghel Gabriel. Nagsiring an anghel: ‘Maopay nga adlaw, Maria. Nalilipay gud hi Jehova ha imo.’ Waray masabti ni Maria an iya karuyag sidngon. Hi Gabriel nagsiring: ‘Magbuburod ka ngan mag-aanak hin lalaki, ngan Jesus an imo igngangaran ha iya. Magmamando hiya sugad nga Hadi. An iya Ginhadian magpapabilin ha waray kataposan.’

Hi Maria nagsiring: ‘Pero birhen ako. Paonan-o ako magkakaanak?’ Hi Gabriel binaton: ‘Waray imposible kan Jehova. An baraan nga espiritu maabot ha imo, ngan magkakaanak ka hin lalaki. An imo paryente nga hi Elizabeth nagburod liwat.’ Hi Maria nagsiring: ‘Kan Jehova ako uripon nga babaye. Matuman unta ha akon an imo ginsiring.’

 Kinadto hi Maria ha usa nga syudad ha kabungtoran basi bisitahon hi Elizabeth. Han hinbatian ni Elizabeth an pangumusta ni Maria, nagkiwa an bata ha iya tiyan. Napuno hiya han baraan nga espiritu ngan nagsiring: ‘Maria, ginbibendisyonan ka ni Jehova. Pribilehiyo gud nga bisitahon ako han nanay han akon Ginoo.’ Hi Maria nagsiring: ‘Gindadayaw ko hi Jehova ha bug-os ko nga kasingkasing.’ Hi Maria nagpabilin kanda Elizabeth hin tulo ka bulan, tapos inuli hiya.

Han hinbaroan ni Jose nga burod hi Maria, karuyag na niya makigbulag. Pero may anghel nga nagpakita ha iya ha inop ngan nagsiring: ‘Ayaw kahadlok pagpakasal ha iya. Waray hiya ginbuhat nga maraot.’ Salit ginkuha ni Jose hi Maria sugad nga iya asawa ngan gindara ha iya balay.