Maríaeʼ juntúul x-chʼúupal kajaʼan kaʼach Nazaret, tu luʼumil Galilea. Letiʼeʼ u láakʼtsil Elisabet. Maríaeʼ taʼaytak kaʼach u tsʼoʼokol u beel yéetel juntúul carpintero ku kʼaabaʼtik José. Le tsʼoʼok seis meses pʼáatak embarazadail Elisabeteʼ, le ángel Gabrieloʼ chíikpaj tiʼ Maríaeʼ ka tu yaʼalajtiʼ: ‹Maʼalob kʼiin x-chʼúupal, tsʼoʼok a lúubul utsil tiʼ Dios›. Letiʼeʼ maʼ tu naʼataj baʼaxten bey úuchik u tʼaʼanloʼ, le oʼolal le angeloʼ tu yaʼalajtiʼ: ‹Yaan a pʼáatal embarazadail yéetel yaan u yantal juntúul a hijo. Jesús ken a tsʼáa u kʼaabaʼ. Letiʼeʼ yaan u gobernar bey reyeʼ yéetel u Reinoeʼ mix bikʼin kun xuʼulul›.

Maríaeʼ tu yaʼalaj: ‹¿Bix túun jeʼel u yantal juntúul in hijoeʼ? Si maʼ yanak mix baʼal in wil yéetel mix juntúul xiibiʼ›. Gabrieleʼ tu yaʼalajtiʼ: ‹Tuláakal baʼax ku yaʼalik Dioseʼ ku béeytal. Kiliʼich muukʼ kun taal ta wóokʼol yéetel yaan u yantal juntúul a hijo. A láakʼtsil Elisabeteʼ embarazada xan›. María túuneʼ tu yaʼalaj: ‹¡U palitsilen Jéeoba! Úuchukten jeʼel bix ta waʼaloʼ›.

 Maríaeʼ bin u xíimbalt Elisabet tiʼ junpʼéel kaaj yaan teʼ puʼukoʼoboʼ. Ka kʼucheʼ tu tsikaj Elisabet. Ka tu yuʼubaj Elisabet u tʼaan Maríaeʼ, le chaambal yaan tu jobneloʼ síitʼnaji. Letiʼeʼ chuʼup yéetel kiliʼich muukʼeʼ ka tu yaʼalaj: ‹María, tsʼoʼok a bendecirtaʼal tumen Jéeoba. Jach kiʼimak in wóol úuchik u taal u xíimbalten tin wotoch u maama in Yuumtsil›. María túuneʼ tu yaʼalaj: ‹Teneʼ kin alabartik Jéeoba yéetel tuláakal in puksiʼikʼal›. Letiʼeʼ pʼáat óoxpʼéel meses tu yiknal Elisabet, ka tsʼoʼokeʼ suunaj tu yotoch yaan Nazaretoʼ.

Ka tu yojéeltaj José embarazada Maríaeʼ, maʼ tu yóotaj tsʼoʼokol u beel tu yéeteliʼ. Chéen baʼaleʼ chíikpaj juntúul ángel tiʼeʼ ka tu yaʼalajtiʼ: ‹Maʼ a chʼaʼik saajkil u tsʼoʼokol a beel yéetel María. Letiʼeʼ maʼ u beet mix baʼal kʼaasiʼ›. Bey túunoʼ Joseeʼ tsʼoʼok u beel yéetel Maríaeʼ ka tu bisaj tu yotoch.