Jabim mi Roma ma nyinge Kaisari Augusto ugam ung’olo nia Juyahudi ceke gidok i adhura mi ng’om thugi pi nigoro nying’gi. E Yosefu giku Maria de gicidho i Bethlehem, kaka ma jupagi Yosefu ular uai i ie. Ubino tap saa ma nwang’u Maria romo nyolo i ie nyathin pare.

Kinde ma gitundo i Bethlehem, giwok ginwang’u kabedo udaru pong’o man kaka ma giromo bedo i ie utie dwol kende. Utie kakeca re ma Maria ugam unyolo i ie wode ma Yesu. Eumo kume ku bongu ma nwenwe man epiele yoo ma ber i wer mi dhiang’.

Nwang’u jukwac moko gibino woko pi nikuro kum leya migi, ceng’ini ku Bethlehem. E mbwang’ kumeni, malaika acel uwok man ucungo i wang’gi, e der mi dwong’ pa Yehova ucarugi. Lworo umaku jukwac ma rac mandha, ento malaika yero igi kumae: ‘Lworo kud unegwu. Atie ku rwonglembe ma ber  mandha. Tin eni Masiya unyolere i Bethlehem.’ E ndhundhu nica, jumalaika dupa giwok i kor polo man giyero kumae: ‘Dwong’ ni Mungu i polo, man kwiocwiny iwi ng’om.’ I ng’eye, jumalaikane gigam girwinyo. E jukwac gitimo ang’o?

Jukwac gicaku weco i kindgi kumae: ‘Wacidhu ndhundhu eni i Bethlehem.’ Gicidho pio pio man ginwang’u Yosefu giku Maria i dwol karacelo ku mukere migi.

Dhanu ceke ma giwinjo lembe ma malaika uyero ni jukwac, igi wang’ lii. Maria uparu cuu i wec pa malaika man wie uwil ungo nyanok de i kum wecne. Jukwac ugam udok ku ng’eigi i bang’ udul leya migi ma gibepaku Yehova pi lembe ceke ma gineno man ma giwinjo.