Ḇeḇepoik ro karajan Romawi, Kaisar Agustus, iwan snonkaku Yahudi syakam fa sfasepen si ro mnu sena oser-oser. Inja, Yusuf ma Maria sura ḇe Yusuf mnu ḇyedi, Betlehem. Fafisu anya, Maria ras ḇyena namnis fa imbe kyain kwar.

Fafisu sura ro Betlehem kwar, susmai rum fa suḇarek roro ḇa, inja suḇarek ro domba padwar sena. Rodia, Maria daḇen Yesus i. Maria kyawef Yesus i kuker srei, ma ryir i ro moḇ domba sya sanan roya.

Ro roḇ ani, fanam ḇe Betlehem, manfarandows riḇeḇeso smamwarek domba sesi ro ḇondi. Fyoro ḇa ido, malaikat oso ryama dores ro ḇarpon sedi ma sananai Yahwe Ḇyedi isnai yar si. Simkak kaku, ḇape malaikat ani ikofen, ’Mkomkak awer. Abar ḇepyum ya isya. Rasine, Mesias ḇyeaḇen kwar ro Betlehem.’ Fafisu anya kako malaikat ḇese sibor srama ma  sikofen, ’Sanandik faro Allah ro nanki, ma marisen ro supswan.’ Ramnai, malaikat ansya kam skaḇer ḇe nanki. Rosai manfarandows ansya sifrur ya?

Sikofen ḇo soḇe, ’Mkorama kora ḇe Betlehem.’ Inja sra mura ḇeri, ma sisrow kuker Yusuf, Maria, ma kapira subani ro padwar domba ani.

Ḇerower farfyar ro manfarandows ansya kam sikandor ma simarisen kaku. Maria kyara pyum malaikat ani wos ḇyena ma ḇyefnder na ḇaḇeri. Manfarandows ansi skaḇer ḇe moḇ domba sesi sḇarek roya. Sikofen kasumasa kaku ḇe Yahwe snar rosai smam ma srower nane.