Hedgavman blong Rom, Sisa Ogastas, i mekem wan loa se olgeta man Jiu oli mas gobak long stret ples blong olgeta, blong ol man oli raetem nem blong olgeta long wan buk. Ale, Josef mo Meri tufala i go long Betlehem, we i ples blong famle blong Josef. Klosap nao, Meri bambae i bonem pikinini blong hem.

Taem tufala i kasem Betlehem, i no moa gat rum blong tufala i slip long hem, ale tufala i go stap long wan haos blong ol anamol. Long ples ya, Meri i bonem Jisas. Hem i kavremap hem long kaliko, nao i putum hem i stap slip long wan bokis we ol man oli putum gras long hem blong ol anamol oli kakae.

Klosap long Betlehem, i gat sam man blong lukaot long sipsip, we oli stap afsaed wetem ol sipsip blong olgeta. Wantaem nomo, wan enjel i kamtru long olgeta mo Jehova i mekem bigfala laet i saen raonabaot long olgeta. Nao olgeta oli fraet tumas, be enjel ya i talem se: ‘Yufala  i no fraet, mi mi gat wan gud nius blong talem long yufala. Tede, Mesaea i bon long Betlehem.’ Nao wantaem nomo, plante enjel long heven oli talem se: ‘Long heven, olgeta oli stap leftemap nem blong God, mo long wol ya, pis i stap wetem ol man.’ Nao ol enjel ya oli lus bakegen. ?Ol man blong lukaot long sipsip oli mekem wanem?

Oli talem se: ‘I gud yumi go long Betlehem.’ Ale, oli go kwiktaem, mo oli faenem Josef mo Meri long haos blong ol anamol wetem bebi blong tufala.

Ol man oli sapraes tumas taem oli harem ol tok we enjel ya i talem long ol man blong lukaot long sipsip. Meri i tingting gud long ol tok ya, hem i no save fogetem. Ol man blong lukaot long sipsip, oli gobak mo oli talem tangkiu long Jehova from ol samting we oli harem mo oli luk.