Vbe ẹghẹ ne Ọgbaisi Ọgọstọs nọ khaevbisẹ yan otọ arriọba ọghe Rom ya wẹẹ ne emwa hia gha rrie ẹvbo iran, ne iran ya gbẹnnẹ eni yotọ, e Josẹf vbe Meri na vbe gha rrie Bẹtlẹhẹm ne ẹvbo e Josẹf. Vbe ẹghẹ na kha na, uki sẹ e Meri nẹ.

Vbe iran ghi sẹ e Bẹtlẹhẹm, iran ma miẹn eke rhọkpa dia, vbọ gberra eke ne a na koko aranmwẹ. Evba ẹre Meri na ghi biẹ Jesu. Ọ na ya ukpọn vbuẹ ọre, ọ na muẹn lovbiẹ ye ako ne aranmwẹ na rri evbare.

Ọsuohan eso ghi gbaroghe ohuan iran vbe orere vbe asọn ọkpa, odibosa ọkpa na wa rhiegbe maa iran vbe udemwurri, vbene uyi ọghe Jehova na gha fi wainwain vbe egbe avbe nene ọsuohuan. Orrirri keghi gbe kue iran, sokpan odibosa nii keghi tama iran wẹẹ: ‘Uwa ghẹ gi ohan mu uwa. Iyẹn nọ maan ẹre I do na ma uwa. A biẹ Mezaia nẹ vbe ẹrẹna,  vbe Bẹtlẹhẹm.’ Vbe ọwarọkpa nii, avbe odibosa nibun keghi rhiegbe ma vbe orere iso, iran na gha kha wẹẹ: ‘Uyi nọ ne Osanobua vbe ẹrinmwi, kevbe ọfunmwegbe nọ ne uhunmwu otagbọn.’ Vbe iran ghi ta ẹmwẹ na nẹ, iran na ru gbẹnnẹ. De emwi ne avbe ọsuohuan na ghi ru?

Iran keghi tama egbe iran wẹẹ: ‘Gi ima wa gha rrie Bẹtlẹhẹm nia.’ Vbe iran ghi sẹ evba, iran keghi miẹn e Josẹf vbe Meri kevbe ọmọ ne iran da biẹ vbe eke ne a na koko aranmwẹ.

Ọ na yan emwa hia unu ruan, vbe iran ghi họn ẹmwẹ ne odibosa tama avbe ọsuohuan. Ẹghẹ hia ẹre Meri ya gha mu ẹmwẹ na roro, ọ ma mianmian hiehie. Vbe avbe ọsuohuan ghi na iyẹn na nẹ, iran na werriegbe bu ohuan ọghe iran, vbene iran na gha ghọghọ khian rhunmwuda emwi ne aro iran sẹ.