Iperentahken kaisar Roma, eme Agustus, gelah kerina kalak Jahudi mulih ku kutana guna idaftar pemerentah. Emaka, Jusup ras Maria pe mulih ku Betlehem, eme kuta kemulihen Jusup. Lanai ndekah, lahir me anak Maria.

Sanga kalak e seh i Betlehem, la lit ingan kalak e erberngi, emaka tading ia i bas sada kandang. I je me Maria ngelahirken Jesus. Ibalutina me Jesus alu uis si lembut, janah ipepedemna i sada ingan peren man nakan asuh-asuhen.

Berngi e, lit permakan-permakan si sangana njagai asuh-asuhen i lapangen, i deher Betlehem. Rempet-rempet, reh malekat ndahi kalak e, janah iban Jahwe ingan kalak e jadi seh kel terangna. Mbiar kel permakan-permakan e. Tapi nina malekat e, ‘Ula kena mbiar. Lit berita si meriah. Wari enda, Mesias nggo lahir i Betlehem.’ Bas sanga si e pe, teridah me malekat-malekat si deban i langit, janah nina, ‘Terpujilah Dibata si i surga, janah dame me i bas doni.’ Kenca si e, bene me malekat-malekat e. Nce, kai si ilakoken permakan-permakan e?

Iban kalak enda me rencana, nina, ‘Ota, mis kita berangkat ku Betlehem.’ Mis kalak e lawes, janah jumpa me kalak e ras Jusup, Maria, bage pe bayina i bas sada kandang.

Luar biasa kel akap kerina kalak si megiken cerita permakan e kerna kai si ikataken malekat ndai. La pernah ilupaken Maria kata malekat e janah terus iukurina. Dung e, mulih me permakan-permakan e ku asuh-asuhenna, janah ipuji kalak enda Jahwe perban kejadin si nggo idahna.