Mwanangana wa Roma, Sesare Augustu, katumine A-Yunda eswe hanga afune ku membo jo ni kulisonekesa. Chocho, Yosefwe ni Maria yaya ku Mbeteleme, kuze kwakatukile asoko ja Yosefwe. Te kwasala hakehe hanga Maria ashite.

Muze ayo ahetele ku Mbeteleme, chihela chimuwika chize te matwama, chapwile wika limba. Mwemuze Maria anakasemena Yesu. Iye kamuvungile ha mahina ni kumusa ha chililo.

Hakamwihi ni Mbeteleme, amwe tufunga te kali haze ha ufuku, ni kufunga mapanga jo. Susumuku umwe mungelo yamana kulutwe lio nawa haze te ali yihatemuka ni pangu lia uhenya wa Yehova. Tufunga yevwa woma, alioze mungelo yaamba ngwenyi: ‘Kanda nwivwa woma. Nguli ni lusango mupema. Mesaya kasemuka musono ku Mbeteleme.’  Hazehene, angelo anji yasoloka mwilu ni kwamba ngwo: ‘Uhenya kuli Zambi mwilu mwahiana, sambukila hano hashi.’ Chocho angelo yatoka. Kuchi tufunga mapanga evwile?

Tufunga yaliamba ngwo: ‘Tuyenu haliapwila ndo ku Mbeteleme.’ Ayo yaya kafuji-fuji, chocho yawana Yosefwe ni Maria mu limba ni mwano wakemba.

Atu eswe waze evwile yize mungelo ambile kuli tufunga, yakomoka. Maria yanyonga chinji ha maliji a mungelo nawa kakaavulamine nilimwe tangwa. Tufunga yafuna ku yendo ya mapanga jo ni kuchichimieka Yehova ha yuma yize evwile.