Akwa Edidem Rome, emi ekekerede Caesar Augustus, ama ọdọhọ kpukpru mme Jew ẹka obio emana mmọ ẹkesịn enyịn̄ ke n̄wed. Ntre Joseph ye Mary ẹma ẹka Bethlehem, obio mme Joseph. Ama ekpere ini emi Mary edimande eyen.

Ke ini mmọ ẹkesịmde Bethlehem, n̄kukụre itie emi mmọ ẹkekụtde ẹdak ibuot ẹkedi ufọk ufene. Do ke Mary akaman Jesus. Enye ama awan̄ Jesus ke ọfọn̄ ayak enịm sụn̄sụn̄ ke usịnudia ufene.

Enyene mme ekpemerọn̄ emi ẹkesụk ẹkpemede erọn̄ mmọ ke an̄wa okoneyo oro ẹkpere Bethlehem. Angel ama ọbiọn̄ọde mmọ ke iso inikiet inikiet; un̄wana ubọn̄ Jehovah ama onyụn̄ ayama ke ofụri itie oro. Idem ama enyek mmọ, edi angel oro ama ọdọhọ mmọ ete: ‘Ẹkûyak idem enyek mbufo. Nda eti mbụk  nsọk mbufo. Messiah amana mfịn emi ke Bethlehem.’ Ke angel oro ama eketịn̄ ikọ ama, mmọ ẹma ẹkụt ediwak angel ke enyọn̄. Mme angel oro ẹma ẹdọhọ ẹte: ‘Ubọn̄ enyene Abasi ke enyọn̄, emem onyụn̄ odu ke isọn̄.’ Ekem kpukpru mme angel oro ẹma ẹsop. Nso ke mme ekpemerọn̄ oro ẹkenam?

Mmọ ẹma ẹdọhọ ẹte: ‘Ẹyak ika Bethlehem idahaoro.’ Mmọ ẹma ẹka ẹkekụt Joseph, Mary, ye nsekeyen oro ke ufọk ufene.

Idem ama akpa mme owo ndikop se angel oro eketịn̄de ọnọ mme ekpemerọn̄. Mary ama enen̄ede ekere ikọ angel oro, ikonyụn̄ ifreke mmọ. Mme ekpemerọn̄ oro ẹma ẹfiak ẹbịne erọn̄ mmọ, ẹnyụn̄ ẹtoro Jehovah ke se mmọ ẹkekụtde ẹnyụn̄ ẹkopde.