Kaisare Augusto, ni ji mɔ ni yeɔ Roma Nɔyeli lɛ nɔ lɛ, fã Yudafoi fɛɛ ni amɛku amɛsɛɛ kɛya maŋ nɔ ni amɛjɛ koni amɛyaŋma amɛgbɛ́ii. No hewɔ lɛ Yosef kɛ Maria fã gbɛ kɛtee Betlehem, ejaakɛ jɛmɛ Yosef weku lɛ jɛ. No mli lɛ, eshwɛ fioo ni Maria baafɔ.

Be ni amɛyashɛ Betlehem lɛ, amɛnáaa he ko amɛhi. No hewɔ lɛ, amɛyahi he ko ni kooloi yeɔ nii yɛ. Jɛmɛ ji he ni Maria fɔ ebi Yesu yɛ. Maria kɛ mamai ha ebi lɛ he ni ekɛ lɛ fɔ̃ nɔ ni kooloi lɛ yeɔ nii yɛ mli lɛ mli.

Tookwɛlɔi komɛi yɛ he ko ni bɛŋkɛ Betlehem amɛmiikwɛ amɛtoi gbɛkɛ yɛ agbo naa. Trukaa lɛ, ŋwɛibɔfo ko badamɔ amɛhiɛ, kɛkɛ ni Yehowa anunyam lɛ kpɛ kɛbɔle amɛ. Tookwɛlɔi lɛ atsui fã, shi ŋwɛibɔfo lɛ kɛɛ amɛ akɛ: ‘Nyɛkashea gbeyei. Miyɛ miishɛɛ sane ko kɛhã nyɛ. Afɔ Mesia lɛ ŋmɛnɛ yɛ Betlehem.’  Nakai ŋmɛlɛtswaa lɛ nɔ nɔŋŋ lɛ, ŋwɛibɔfoi babaoo pue yɛ ŋwɛi ni amɛjie Nyɔŋmɔ yi amɛkɛɛ: ‘Anunyam ahã Nyɔŋmɔ yɛ ŋwɛi, ni toiŋjɔlɛ aba shikpɔŋ lɛ nɔ.’ Kɛkɛ ni amɛ fɛɛ amɛlaaje. Ani ole nɔ ni tookwɛlɔi lɛ fee?

Amɛkɛɛ amɛhe akɛ: ‘Nyɛhãa wɔyaa Betlehem bianɛ nɔŋŋ.’ No hewɔ lɛ, amɛtee oya, ni amɛyana Yosef kɛ Maria, kɛ gbekɛ ŋmɔŋ lɛ ni ekã kooloi aniyenii anɔ mli.

Tookwɛlɔi lɛ gba mɛi nɔ ni ŋwɛibɔfo lɛ kɛɛ amɛ lɛ, ni mɛi fɛɛ ni nu lɛ anaa kpɛ amɛhe. Maria susu nɔ ni ŋwɛibɔfo lɛ wie lɛ he kɛtee shɔŋŋ ni ekɛto ejwɛŋmɔ mli. Tookwɛlɔi lɛ ku amɛsɛɛ amɛyakwɛ amɛtoi lɛ, ni amɛda Yehowa shi yɛ nibii fɛɛ ni amɛna kɛ nibii fɛɛ ni amɛnu lɛ ahewɔ.