De Cäsar Auguschtus isch de Herrscher vom Römische Riich. Er het de Befehl gee, dass alli Jude i ihre Heimatort müend gah und sich dört la iischribe. Wil d Familie vom Joseph vo Bethlehem chunnt, mached sich d Maria und de Joseph uf de Weg dörthii. D Maria isch hochschwanger und s Baby sött scho glii cho.

Wo si z Bethlehem achömmed, finded si nume no imene Stall es Plätzli zum Schlafe. I dem Stall bringt d Maria ihre Sohn Jesus uf d Welt. Si packt ihn i weichi Tüecher ii und leit ihn liebevoll ine Fuetterchrippe.

I de Nöchi vo Bethlehem sind i de Nacht es paar Hirte verusse und passed uf ihri Schaf uf. Plötzlich staht en Engel vor ihne und herrlichs Liecht vo Jehova lüchtet um si ume. D Hirte hend Angscht, aber de Engel seit: «Ihr müend kei Angscht ha! Ich ha wunderbari Neuigkeite. De Messias isch hüt z Bethlehem gebore.» I dem Moment gsehnd si ganz vil anderi Engel am Himmel, wo rüefed: «Alli Herrlichkeit ghört Jehova im Himmel und Fride de Mensche uf de Erde.» Denn verschwinded d Engel wider. Was mached d Hirte jetzt?

Si säged zunenand: «Chömmed, mir göhnd uf Bethlehem.» Si mached sich sofort uf de Weg und finded dört im Stall d Maria und de Joseph mit ihrem Baby.

D Hirte verzelled überall, was de Engel ihne gseit het. Alli stuuned nume eso über das, wo si ghöred. D Maria denkt vil über d Wort vom Engel nache und vergisst si ihres Lebe lang nie meh. D Hirte göhnd denn wider zrugg zu ihrne Schaf und säged Jehova Danke für all das, wo si gseh und ghört hend.