Roma Hkawseng Mungdan a hkawhkam Kehta Agustu gaw, Yuda masha ni yawng, tinang a buga de wa nna, amying jahpan sa bang na matu, tara jahkrat dat ai. Dai majaw, Yosep hte Mari gaw Yosep a buga re ai Betlehem mare de, bu hkawm sa ma ai. Dai shaloi, Mari gaw ma shangai na aten gu taw nga sai.

Betlehem mare de shan du ai shaloi, manam na matu nga ulawng sha mu tam ai. Dai shara hta sha, Mari gaw kasha Yesu hpe shangai wa ai. Shi gaw ma hpe nbat hte kayawp nna, ushat wakang hta kaleng tawn da ai.

Betlehem makau hta sagu rem ai masha nkau mi gaw, shinggan kaw nga ai udat shara hta sagu rem taw nga ai. Akajawng sha, lamu kasa langai dan pru wa nna, Yehowa a hpung shingkang gaw shanhte a grup yin hta htoi kabrim wa ai. Sagu rem ni hkrit kajawng mat yang, lamu kasa ndai hku tsun ai: ‘Hkum hkrit mu. Ngai kabu gara shiga sa tsun ai re. Dai ni, Betlehem hta Meshia shangai wa sai.’ Dai shaloi, sumsing lamu kaw lamu kasa law law dan pru wa  nna, ndai hku shakawn kungdawn ma ai: ‘Sumsing lamu hta, Karai Kasang a hpung shingkang dan hkung nga u ga law. Ga ntsa e mung ngwi pyaw u ga law.’ Dai hpang, lamu kasa ni mat mat ai. Sagu rem ni matut nna hpa galaw ma ai kun?

Sagu rem ni gaw, shada da ndai hku tsun ma ai: ‘Ya, Betlehem de kalang ta sa saga.’ Shanhte alawan sa nna sa yu ai shaloi, nga ulawng kata hta, Yosep yan Mari hte shan a makau hta ma chyangai hpe mu ma ai.

Sagu rem ai masha ni hpe lamu kasa sa tsun ai ga hpe, na ai masha yawng gaw grai mau ma ai. Mari mung lamu kasa a ga hpe atsawm myit nna matsing da ai. Sagu rem ni mung, shanhte mu ai, na ai lam yawng a matu, Yehowa hpe shakawn kungdawn nna, shanhte a sagu ni hpang de bai wa mat ai.