KPƐLƖKƲƲ 70
Ɛsɔ tiyiyaa susi Yesu lʋlʋʋ tɔm
Roma wiyaʋ sɔsɔ Sezaarɩ Ogustɩ ɖʋ paɣtʋ se pala kɩgalʋʋ nakʋyʋ nɛ pʋyɔɔ lɛ, pɩwɛɛ se paa weyi ɛpɩsɩ ɛ-cɔzɔnaa tɛtʋ taa. Pʋyɔɔ Yosɛɛfʋ kpaɣ Maarɩɩ nɛ powolo Bɛtɩlɛhɛm, ɖenɖe ɛ-cɔzɔnaa lɩnaa yɔ. Alɩwaatʋ ndʋ tɩ-taa lɛ, pɩɩkazɩ pazɩ se Maarɩɩ ɛlʋlɩ.
Patalɩ Bɛtɩlɛhɛm tɛtʋ taa lɛ, kalakʋ nakʋyʋ taa papɩzaa nɛ pehiɣ lone. Peeɖe Maarɩɩ lʋlɩ ɛ-pɩyalʋ Yesu. Ɛhɔkɩ-ɩ pɩsaʋ taa nɛ ɛhɩzɩ-ɩ camɩyɛ wonuu ŋgʋ kɩ-taa paɖʋʋ kpɩna tɔɔnaɣ yɔ.
Ninɖiɣyaa nabɛyɛ kaawɛɛ nɛ peɖiyiɣ po-wondu Bɛtɩlɛhɛm cɔlɔ kpam ɖoo ana a-taa. Pɩkɛdaa lɛ, Ɛsɔ tiyiyu nɔɔyʋ lɩɩ pɛ-ɛsɩndaa ñalɩmɩyɛ naɖɩyɛ taa. Nɛ sɔɔndʋ kpa ninɖiɣyaa mba, ɛlɛ Ɛsɔ tiyiyu heyi-wɛ se: ‘Itaase sɔɔndʋ, mɔnkɔnɩ-mɩ tɔm kɩbandʋ natʋyʋ. Sɔnɔ palʋlɩ Mesiya Bɛtɩlɛhɛm tɛtʋ taa.’ Alɩwaatʋ ndʋ tɩ-taa lɛ, Ɛsɔ tiyiyaa sakɩyɛ lɩɩ ɛsɔdaa nɛ pɔyɔɔdʋʋ se: ‘Pasa Ɛsɔ ɛsɔdaa nɛ ɛyaa hiɣ laŋhɛzɩyɛ tataa.’ Pʋwayɩ lɛ, tiyiyaa mba pamʋʋ. Ninɖiɣyaa mba panɩ mbʋ lɛ, ɛbɛ palaba?
Peheyi ɖama se: ‘Ðɩkʋyɩ nɛ ɖɩɖɛɛ Bɛtɩlɛhɛm kpaagbaa.’ Pakʋyɩ lɛɛ lɛɛ nɛ powolo pana Yosɛɛfʋ nɛ Maarɩɩ nɛ pa-pɩyalʋ kalakʋ taa.
Pɩɖɩɣzɩ ɛyaa mba payɩ panɩ tɔm ndʋ Ɛsɔ tiyiyu heyi ninɖiɣyaa yɔ. Maarɩɩ maɣzɩ tɔm ndʋ tɩ-yɔɔ siŋŋ nɛ ɛtɩsɔɔ-tʋ wiɖiyi. Ninɖiɣyaa pɩsaɣ po-wondu cɔlɔ lɛ, pɛwɛɛ nɛ pɛɖɛyɩɣ Yehowa mbʋ panawa nɛ ndʋ panɩwa yɔ, tɩ-yɔɔ.
“Ɛsɔ [cɔlɔ] malɩnaa nɛ mɔnkɔɔ, mantɩkɔɔ yem ma-maɣmaɣ, ɛnʋ etiyini-m.”—Yohanɛɛsɩ 8:42
Kalɩ ɖɔɖɔ....
MAƔZƖNƖ PE-TISUU
Maarɩɩ maɣzaɣ tɔm ndʋ “tɩ-yɔɔ ɛ-laŋɩyɛ taa”
Mbʋ mbʋ Maarɩɩ katɩ Bɛtɩlɛhɛm yɔ, pɩkpazɩ e-tisuu ɖoŋ Yehowa lidaʋ tɔm na yɔɔ.
YESU KƐNƖ NƲMƆƲ, TOOVENIM NƐ WEZUU
Paɖʋ Yesu hɩɖɛ pʋcɔ palʋlʋʋ-ɩ
Ɛzɩma Elizaabɛɛtɩ nɛ e-lotu taa pɩɣa paɖʋ Yesu hɩɖɛ?
YESU KƐNƖ NƲMƆƲ, TOOVENIM NƐ WEZUU
Le nɛ ɛzɩmtaa palʋlɩ Yesu?
Ɛzɩma ɖɩlaba nɛ ɖɩna se patɩlʋlɩ Yesu Saŋayɩŋ fenaɣ kɩyakʋ 25 ŋgʋ wiye?
