ETUKULWA 70
Ovaengeli tava shiivifa okudalwa kwaJesus
Omupangeli wouhamba waRoma, Omukesari Augustus, okwa li a shiivifa kutya Ovajuda nava shune koilongo oko va dalelwa ve ke lishangife. Onghee hano, Josef naMaria ova li va ya kuBetlehem, oko kwa dja ovapambele vaJosef. Pefimbo opo Maria okwa li e li pokumona okaana.
Eshi va fika muBetlehem, ova li ashike va mona onhele yokunangala moshiunda shoimuna. Maria omo a monena Jesus moshiunda osho. Okwa li e mu tonyena momalapi mapu ndele te mu nangeke metemba lokulila oimuna.
Opa li ovafita va nangela oimuna yavo moixwa popepi naBetlehem. Ova li va holokelwa komweengeli ombadilila nova li va minikilwa kouyelele woshinge shaJehova. Ovafita ova li va tila, ashike omweengeli okwe va lombwela a ti: ‘Inamu tila. Onde mu etela onghundana iwa. Messias okwa dalelwa nena muBetlehem.’ Pomhito oyo, ovaengeli vahapu ova li va holoka tava ti: ‘Efimano olaKalunga meulu, nombili kombada yedu.’ Opo nee ovaengeli ova ya. Mbela ovafita ova li va ninga po shike?
Ovafita ova li va lombwelafana va ti: ‘Natu yeni paife kuBetlehem.’ Ova ya diva ndele tava hange Josef naMaria moshiunda nokahanana kavo.
Keshe oo a uda osho omweengeli a lombwela ovafita okwa li a kumwa. Maria okwa li a dilonga moule keendjovo domweengeli noine di dimbwa nande. Ovafita ova li va shuna koimuna yavo, tava pandula Jehova omolwoinima aishe oyo va mona nova uda.
“Ame nda dja muKalunga, onde uya nda dja kuye; Ame inandi dja mwaame mwene, ndelenee Ye okwa tuma nge.” — Johannes 8:42
Otashi dulika yo u hafele oikundafanwa ei
NATU HOPAENENENI EITAVELO LAVO
Maria okwa fika “pexulifodiladilo momutima waye”
Oiningwanima oyo ya li ya ningwa muBetlehem oya li ya pameka eitavelo laMaria momaudaneko aKalunga.
JESUS OYE ONDJILA, NOSHILI NOMWENYO
Jesus ta fimanekwa ofimbo ina dalwa
Ongahelipi Elisabet nokaana kaye inaka dalwa va fimaneka Jesus?
JESUS OYE ONDJILA, NOSHILI NOMWENYO
Jesus okwa dalelwa peni nonaini?
Otu shi shii ngahelipi kutya Jesus ina dalwa 25 aDesemba?
