មេរៀនទី៧០
ទេវតាប្រកាសអំពីកំណើតលោកយេស៊ូ
អធិរាជរ៉ូមឈ្មោះសេសារអូគូស បានចេញបញ្ជាឲ្យជនជាតិយូដាទាំងអស់ត្រឡប់ទៅចុះបញ្ជីឈ្មោះនៅស្រុកកំណើតខ្លួន។ ដូច្នេះ យ៉ូសែបនិងម៉ារៀចេញដំណើរទៅក្រុងបេថ្លេហិម ជាស្រុកកំណើតរបស់យ៉ូសែប។ នៅពេលនោះ ម៉ារៀជិតដល់ថ្ងៃសម្រាលកូនហើយ។
ពេលមកដល់ក្រុងបេថ្លេហិម ពួកគាត់រកមិនបានកន្លែងស្នាក់នៅទេ។ ដូច្នេះ ពួកគាត់ត្រូវស្នាក់នៅក្នុងក្រោលសត្វ។ ម៉ារៀបានសម្រាលទារកយេស៊ូនៅទីនោះ។ នាងរុំកូននឹងចម្រៀកក្រណាត់ រួចផ្ដេកកូនថ្នមៗទៅក្នុងស្នូក។
នៅជិតក្រុងបេថ្លេហិម មានគង្វាលខ្លះកំពុងនៅឯវាលពេលយប់ ដើម្បីចាំយាមហ្វូងសត្វរបស់ខ្លួន។ រំពេចនោះ ទេវតាមួយបានលេចមកឈរនៅមុខពួកគេ ហើយសិរីរុងរឿងរបស់ព្រះយេហូវ៉ាភ្លឺចិញ្ចាចជុំវិញពួកគេ។ ពួកគង្វាលភ័យខ្លាចជាខ្លាំង តែទេវតាប្រាប់ថា៖ ‹កុំខ្លាចឡើយ។ ខ្ញុំមានដំណឹងល្អប្រាប់ដល់អ្នករាល់គ្នា។ ថ្ងៃនេះ នៅក្រុងបេថ្លេហិម មេស្ស៊ីបានកើតមកហើយ›។ នៅខណៈនោះ ទេវតាជាច្រើនរូបក៏លេចនៅលើមេឃ ហើយបន្លឺសំឡេងថា៖ ‹យើងសូមសរសើរតម្កើងព្រះនៅស្ថានសួគ៌ ហើយសូមឲ្យផែនដីមានសេចក្ដីសុខសាន្ត›។ បន្ទាប់មក ទេវតាទាំងនោះក៏បាត់ទៅវិញ។ ដូច្នេះ តើពួកគង្វាលបានធ្វើយ៉ាងណា?
ពួកគង្វាលនិយាយគ្នាថា៖ ‹យើងត្រូវប្រញាប់ទៅក្រុងបេថ្លេហិម›។ ពួកគេនាំគ្នាចេញទៅភ្លាម ហើយបានរកឃើញយ៉ូសែបនិងម៉ារៀនៅក្នុងក្រោល ជាមួយទារកដែលទើបនឹងកើត។
ពេលពួកគង្វាលរៀបរាប់អំពីអ្វីដែលទេវតាបាននិយាយ នោះអស់អ្នកដែលឮមានការភ្ញាក់ផ្អើលជាខ្លាំង។ ប៉ុន្តែ ម៉ារៀបានរំពឹងគិតពាក្យទាំងនោះ ហើយចាំជាប់នៅក្នុងចិត្ត។ បន្ទាប់មក ពួកគង្វាលត្រឡប់ទៅឯហ្វូងសត្វរបស់ពួកគេវិញ ទាំងអរគុណព្រះយេហូវ៉ាចំពោះអ្វីៗដែលពួកគេបានឃើញនិងបានឮ។
«ខ្ញុំបានមកពីព្រះ ក៏នៅទីនេះដោយសារព្រះ។ ខ្ញុំមិនមែនមកដោយគំនិតរបស់ខ្ញុំទេ ប៉ុន្តែព្រះបានចាត់ខ្ញុំឲ្យមក»។—យ៉ូហាន ៨:៤២
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
លោកយេស៊ូបានទទួលកិត្ដិយសមុនលោកកើតមក
តើអេលីសាបិតនិងកូនក្នុងផ្ទៃនាងផ្ដល់កិត្ដិយសដល់លោកយេស៊ូយ៉ាងដូចម្ដេច?
លោកយេស៊ូ ជាផ្លូវ ជាសេចក្ដីពិត ជាជីវិត
តើលោកយេស៊ូកើតនៅកន្លែងណា? តើលោកកើតនៅពេលណា?
តើតាមរបៀបណាយើងអាចដឹងថាលោកយេស៊ូមិនបានកើតនៅថ្ងៃទី២៥ ខែធ្នូ?
